លោក Jose Mourinho ថាក្រុមនៅអង់គ្លេសទាំងអស់នឹងមិនអាចឡើងដល់វគ្គផ្ដាច់ព្រ័ត្រ UEFA Champions League បានឡើយ ព្រោះពួកគេខ្វះបទពិសោធ។
គិតត្រឹមវគ្គ៨ក្រុមចុងក្រោយនេះ ក្រុមអង់គ្លេសដល់ទៅ៤ឯណោះបានឡើងដល់វគ្គនេះ។ ប៉ុន្តែពួកគេក៏មានក្រុមខ្លះដូចជា Man City និង Spurs ជាដើម បានប៉ះគ្នាបណ្ដើរៗហើយដែរ។ ទន្ទឹមគ្នានេះដែរ លោក Jose Mourinho អ្នកចាត់ការដែលទើបត្រូវ Man Utd បណ្ដេញចេញបាននិយាយថាក្រុមទាំង៤ Man City , Man Utd , Spurs និង Liverpool គឺគ្មានសមត្ថភាពអាចឡើងដល់វគ្គផ្ដាច់ព្រ័ត្រពាន Champions League ឡើយ។
លោកបានប្រាប់មូលហេតុដែលនិយាយដូច្នេះថា៖ “ពួកគេទាំងអស់ខ្វះបទពិសោធច្រើនក្នុងការលេងពានរង្វាន់នេះ។ ខ្ញុំគាំទ្រនិងជឿជាក់ថា Juventus និង Barcelona នឹងប្រកួតប្រជែងគ្នាយកពាននារដូវកាលនេះហើយ។ វាជាការប្រជែងគ្នាម្ដងទៀតរវាង Messi និង Ronaldo ។ ក្រុមដែលមានពួកគេទាំងពីរនាក់ សុទ្ធតែមានឱកាសច្រើនជាងក្រុមដទៃជានិច្ច”៕ប្រភព៖ Thesun
