ក្រុមបិសាចក្រហម Manchester United ពិតជាធ្វើបានល្អមែនទែនក្នុងការប្រកួតលីគអង់គ្លេសយប់មិញ ដោយយកឈ្នះក្រុម Crystal Palace បាន ៣-១ ស្របពេលកីឡាករសំខាន់របួសដល់៨នាក់។
១០សប្ដាហ៍ហើយ ដែលលោក Ole បានមកកាន់ក្រុម Manchester United ហើយធ្វើឱ្យក្រុមនេះខ្លាំងឡើងវិញបាន។ ជាក់ស្ដែងក្នុងការប្រកួតយប់មិញនេះ ក្រុមបិសាចក្រហមជួបវិបត្តិកីឡាកររបួសច្រើនមែនទែនរហូតដល់៨នាក់ ប៉ុន្តែពួកគេនៅតែអាចយកឈ្នះក្រុម Crystal Palace ដល់ទៅ ៣-១។ ៣គ្រាប់ដែលយកបាន៣ពិន្ទុបន្ថែមនេះ ធ្វើបានសម្រេចដោយ Lukaku ២គ្រាប់ និង Ashley Young ១គ្រាប់។
លោក Solskjaer បាននិយាយចំពោះការប្រកួតនេះដែរថា៖ “នេះជាការប្រកួតដែលខ្ញុំភ័យខ្លាច ព្រោះខ្ញុំដឹងថាក្រុមយើងនឹងពិបាកយកឈ្នះ ប៉ុន្តែក្បួនរបស់យើងបានទទួលជោគជ័យ យើងអាចគ្រប់គ្រងការប្រកួតនេះបាន ហើយយើងក៏ទទួលបានជ័យជម្នះ។ អរគុណដល់ Lukaku ដែលជាចំណែកសំខាន់ក្នុងការប្រកួតនេះ”៕ប្រភព៖ Dailymail