ក្រុមកាំភ្លើងធំ Arsenal នឹងត្រូវបើកទ្វាកីឡដ្ឋានរបស់ខ្លួនស្វាគមន៍ក្រុមភ្ញៀវ Bate Borisov ក្នុងការប្រកួតពានរង្វាន់ Europa League វគ្គ៣២ក្រុមចុងក្រោយ ជើងទី២ វេលាម៉ោង១២:៣០នាទីយប់។
កាលពីជើងទី១កន្លងទៅ គេដឹងហើយថាក្រុម Arsenal បានបរាជ័យក្នុងលទ្ធផល ១-០។ ដូច្នេះជើងទី២នេះ ពួកគេត្រូវការយ៉ាងតិច២-០ ដើម្បីអាចឡើងទៅវគ្គបន្ដបាន។ គេនៅចាំបានយ៉ាងច្បាស់ថាក្រុមទាំងពីរធ្លាប់ជួបគ្នាម្ដងមកហើយក្នុងពានរង្វាន់Europa League នេះដែរ កាលពីឆ្នាំ២០១៧កន្លងទៅ។ ដោយគ្រានោះ ក្រុមកាំភ្លើងធំក្នុងដីខ្លួនឯង យកឈ្នះ Bate បានដល់ទៅ ៦-០ ឯណោះ។ ដូច្នេះចាំមើលនៅយប់នេះវិញ ថាតើលទ្ធផលនឹងទៅជាយ៉ាងណា?
មុនការប្រកួតនេះចាប់ផ្ដើមដែរ ក្រុមការងារនឹងបង្ហាញ៥ចំណុចដែលគ្រប់គ្នាត្រូវដឹងអំពីការប៉ះគ្នានេះ៖
១ នេះជាលើកទី២ ដែល Arsenal បើកទ្វាផ្ទះស្វាគមន៍ក្រុមភ្ញៀវ Bate ដោយកាលពីលើកទី១នោះ ពួកគេឈ្នះដល់ ៦-០
២ សរុបពីដើមមក ក្រុមមកពីប្រទេសបេឡារូសនេះទៅលេងនៅអង់គ្លេស៤ដង ចាញ់៣ដងទៅហើយក្នុងការប្រកួត UEFA Europa League នេះ។ ១លើកដែលពួកគេឈ្នះគឺឈ្នះ Everton នៅឆ្នាំ២០០៩។
៣ Arsenal ធ្លាប់រកគ្រាប់បាល់មិនបានសោះគិតទាំងពីរជើងក្នុងពានរង្វាន់ទ្វីបអឺរ៉ុបនេះកាលពីឆ្នាំ១៩៩៥។ គ្រាដែលពួកគេស្មើ AC Milan ក្នុងដីខ្លួនឯង ០-០ បន្ទាប់មកចាញ់ក្រៅដី ២-០។
៤ Bate ទើបតែឈ្នះ៣ប្រកួតជាប់គ្នាក្នុងការប្រកួត Europa league នេះ។ ខណៈដែល១៦ប្រកួតមុននោះ ពួកគេឈ្នះបានតែ២ប្រកួតប៉ុណ្ណោះ ក្រៅពីនោះស្មើ៥ និងចាញ់៩ដង។
៥ កីឡាករ Igor Stasevich ដែលជាអ្នកបញ្ជូនបាល់ឱ្យមិត្តរួមក្រុមស៊ុតចូល Arsenal កាលពីជើងទី១ គឺជាកីឡាករបញ្ជូនបាល់ឱ្យមិត្តរួមក្រុមបានច្រើនជាងគេ៧គ្រាប់ហើយ។ រូបគេជាអ្នកបញ្ជូនបាល់ឱ្យមិត្តរួមក្រុមស៊ុតបានច្រើនជាងគេនាការប្រកួត UEFA Europa League នារដូវកាលនេះ៕ប្រភព៖ Dailymail
