Kluivert អតីតកីឡាករក្រុម Barcelona មើលឃើញសមត្ថភាពរបស់ខ្សែប្រយុទ្ធវ័យក្មេង Marcos Rashford ថាពិតជាល្អខ្លាំងណាស់ មានទាំងល្បឿន បច្ចេកទេស និងចិត្តចង់ឈ្នះ។
ខ្សែប្រយុទ្ធជម្រើសជាតិអង់គ្លេសកំពុងក្លាយជាតួអង្គសំខាន់ក្នុងក្រុមបិសាចក្រហមនៅតំបន់ខាងលើ ដោយសារតែរូបគេតែងតែរកគ្រាប់បាល់បានជានិច្ច។ ស្ថិតក្នុងវ័យក្មេងយ៉ាងនេះ មានក្លឹបជាច្រើនកំពុងចង់បានរូបគេ ស្របពេលដែលបិសាចក្រហមវិញក៏ព្យាយាមរក្សាឱ្យបានខ្សែប្រយុទ្ធល្អម្នាក់នេះដែរ។
ក្នុងនោះ Kluivert ដែលជាអតីតកីឡាករជោគជ័យម្នាក់របស់ក្រុមអ្នកមានបុណ្យ មើលឃើញថា Rashford បើបានទៅ Barcelona នឹងកាន់តែល្អជាងនេះមិនខាន។ “ខ្ញុំគិតថាមានកីឡាករមិនច្រើនទេដែលអាចលេងនៅ La Liga បាន។ ប៉ុន្តែបើមើលបច្ចុប្បន្ននេះ ខ្ញុំគិតថា Rashford សក្ដិសមបំផុតសម្រាប់ក្រុម FC Barcelona ។ គាត់មានជំនាញ អត្តចរិក គាត់លឿន គាត់ឆាប់យល់ ហើយគាត់អាចរកគ្រាប់បាល់បាន។ ប្រសិនបើគាត់ទៅ Barcelona គាត់នឹងក្លាយជាខ្សែប្រយុទ្ធកំពូលម្នាក់”។
យុវជនថ្នាលខាងលើនេះនៅសល់កុងត្រាជាមួយក្រុមបិសាចក្រហមរហូតដល់ឆ្នាំ២០២០ ដោយបច្ចុប្បន្នរូបគេទទួលបានកម្លាំងពលកម្ម ១៥០ ០០០ផោនក្នុង១សប្ដាហ៍៕ប្រភព៖ Dailymail
