ក្រុមបិសាចក្រហម Manchester United បានយកឈ្នះលើក្រុម Fulham ក្នុងលទ្ធផល ៤-១ នាការប្រកួតលីគកំពូលអង់គ្លេសកាលពីយប់មិញនេះ។៤គ្រាប់ជ័យជម្នះរបស់ក្រុមលោក Jose Mourinho នេះ ធ្វើបានសម្រេចដោយ Ashley Young នាទី១៣ Mata នាទី ២៨ Lukaku នាទី៤២ និង១គ្រាប់ចុងក្រោយធ្វើបានដោយ Rashford នាទី៨២។
១គ្រាប់របស់ក្រុម Fulham ធ្វើបានសម្រេចដោយ Kamara បាល់ប៉េណាល់ទីនាទី៦៧។ ចប់ការប្រកួតនេះទៅ ខ្សែបម្រើ Mata បាននិយាយថាក្រុមទាំងមូលត្រូវការទម្រង់លេងបែបនេះ ឱ្យបានច្រើនបំផុត។“ទម្រង់លេងនេះហើយ ជាអ្វីដែលក្រុមនិងអ្នកគាំទ្រចង់ឃើញ។ ពួកគេសប្បាយចិត្តនៅពេលយើងរកគ្រាប់បាល់បានច្រើនដូច្នេះ ហើយវាជាអ្វីដែលក្រុម Man Utd ធ្លាប់ធ្វើបានកន្លងមក។
យើងដឹងថាប៉ុន្មានប្រកួតកន្លងមក យើងធ្វើមិនបានល្អ ប៉ុន្តែវាគ្រាន់តែជាការចាប់ផ្ដើម ហើយយើងនឹងមិនអស់សង្ឃឹម បោះបង់ចោលឡើយ។ យើងនឹងប្រឹងប្រែងបន្ដទៅទៀត” សម្ដីអតីតកីឡាករ Chelsea ។ក្រុម Man Utd ហាក់ដូចជាបាត់បង់ឱកាសលើកពានរង្វាន់ English Premier League ទៅហើយ ដោយបច្ចុប្បន្ននេះ ពួកគេទើបតែមាន២៦ពិន្ទុប៉ុណ្ណោះ ឆ្លងកាត់១៦ប្រកួត។ ខណៈដែលក្រុមកំពូលតារាង Liverpool វិញ មានដល់ទៅ៤២ពិន្ទុទៅហើយ៕
ប្រភព៖ DailyMail
