លោក Milovan Rajevac គ្រូបង្វឹកក្រុមថៃ បានបញ្ជាក់ថាលោកមើលឃើញយ៉ាងច្បាស់ពីអារម្មណ៍មិនមូលរបស់ Adisak ក្នុងការទាត់ប៉េណាល់ទីនេះ ប៉ុន្តែមិនអាចដូរបានព្រោះសន្យាផ្ដល់បាល់នេះឱ្យរូបគេទៅហើយ។
ក្រុមបាល់ទាត់ជម្រើសជាតិម៉ាឡេស៊ី បានយកឈ្នះលើក្រុមថៃបានឡើងទៅវគ្គផ្ដាច់ព្រ័ត្រពានរង្វាន់ AFF Suzuki Cup 2018 ហើយ ក្រោយលេងស្មើក្នុងដីថៃ ២-២ ក្នុងជើងទី២ ខណៈដែលជើងទី១កន្លងទៅបានត្រឹមស្មើគ្នា ០-០។ និយាយពីការប្រកួតនេះដែរ លោក Milovan គ្រូបង្វឹកថៃ សរសើរដល់ទឹកចិត្តកីឡាកររបស់ម៉ាឡេស៊ី មានចិត្តចង់ឈ្នះការប្រកួតជាងកីឡាករក្រុមថៃទៅទៀត ទើបចុងក្រោយលទ្ធផលពួកគេបានឡើងវគ្គបន្ដនេះ។
និយាយពីការរបូតឱកាសមាសចុងម៉ោងវិញនោះ គ្រូបង្វឹកសញ្ជាតិសែបខាងលើបាននិយាយដូច្នេះថា៖ “ខ្ញុំបានគិតពីការប្ដូរអ្នកទាត់បាល់នោះដែរ ដើម្បីយកអ្នកមានអារម្មណ៍មូលជាង Adisak ប៉ុន្តែយើងបានយល់ព្រមឱ្យគាត់ទាត់បាល់ប៉េណាល់ទីនេះ តាំងពីមុនការប្រកួតម្ល៉េះ។ វាជាសំណាងអាក្រក់មួយសម្រាប់គាត់ដែលទាត់មិនចូល ប៉ុន្តែច្បាស់ណាស់ យើងនៅខាងគាត់ជានិច្ច”។គ្រូបង្វឹកបានបន្ថែមទៀតថាបរាជ័យនេះ គឺជាបទពិសោធមួយសម្រាប់ក្រុមទាំងមូល ដើម្បីត្រៀមខ្លួនឱ្យល្អបំផុតចូលលេងពានរង្វាន់ AFC Cup 2019 នាពេលខាងមុខនេះ៕ប្រភពFoxsportsasia