ប្រកួតជើងទី ១ រវាងក្លឹបយក្សទាំងបួន នៅជំនួបពីរគូធំៗមានផ្សាយបន្តផ្ទាល់លើទំព័រ CTS SPORTS កាលពីយប់មិញ បានបញ្ចប់ទៅដោយលទ្ធផលស្មើសងខាង ២-២ និង ៣-៣ យ៉ាងណាយើងចាប់អារម្មណ៍គូឯក Arsenal ប៉ះ Bayern Munich ហាក់មានរឿងរ៉ាវគួរឲ្យកត់សម្គាល់ច្រើន និងខ្លះក៏មិនទាន់មានចម្លើយសម្រាប់បងប្អូនយើងនៅឡើយ។
ដូចករណីកីឡដ្ឋានប្រើប្រាស់ឈ្មោះផ្លូវការ ខុសពីសព្វមួយដង និងកៅអីក្នុងកីឡដ្ឋានហុំព័ទ្ធសុទ្ធតែឈុតអ្នកគាំទ្រ Arsenal ពោលមិនមានអ្នកគាំទ្រ Bayern Munich សូម្បីតែម្នាក់។ តាមពិតពាក់ព័ន្ធនឹងរឿងរ៉ាវនេះ ចម្លើយមិនជាវែងឆ្ងាយអូសបន្លាយអីពេកនោះទេ តែវាក៏ជាចម្ងល់ដែលកម្រមានបងប្អូនយើងបានដឹង ត្រង់វាសុទ្ធសឹងជាច្បាប់បានចែងចេញពីសមាគមបាល់ទាត់អឺរ៉ុប UEFA។
ត្រង់ឃ្លាមួយបានចែងថា គ្រប់បណ្តាកីឡដ្ឋានជាម្ចាស់ផ្ទះទាំងអស់ នឹងមិនអនុញ្ញាតឲ្យប្រើប្រាស់ឈ្មោះ ជាប់ម្ចាស់ឧបត្ថម្ភ ឬ Sponsor របស់ក្លឹប ក្នុងលក្ខខណ្ឌណាមួយជាដាច់ខាត។ ឥឡូវយើងបកទៅមើលភាពជាក់ស្តែងនៃក្លឹបកាំភ្លើងធំ Arsenal បានសហការជាមួយក្រុមហ៊ុនអាកាសចរណ៍ខ្នាតយក្ស Emirates របស់អារ៉ាប់រួម តាំងឆ្នាំ ២០០៦ មកទល់សុពលភាពផុតកំណត់នាឆ្នាំ ២០២៨ លើតួលេខប្រាក់ឧបត្ថម្ភមួយឆ្នាំជាង ៥០ លានដុល្លារ។
ហេតុផលនេះ ទើបតម្រូវឲ្យពួកគេប្រើប្រាស់ឈ្មោះផ្លូវការនៃកីឡដ្ឋានទៅជា Emirates Stadium តែយ៉ាងណាច្បាប់របស់ UEFA ដែលចែងមកហើយ ក៏ឥតអាចប្រកែកបាន ម្ល៉េះដូចប្រកួតយប់មិញ គេហៅកីឡដ្ឋាននោះជា Arsenal Stadium ជាឈ្មោះចុះបញ្ជីផ្លូវការមួយផ្សេងទៀតរបស់ក្លឹបនិងសមាគមបាល់ទាត់អឺរ៉ុប។
ករណីនេះក៏នឹងអនុវត្តទៅលើក្លឹបដទៃទៀត ជាក់ស្តែងដូច Manchester City ដែលពួកគេត្រូវបើកកីឡដ្ឋាន Etihad Stadium ស្វាគមន៍ក្លឹបភ្ញៀវ Real Madrid នៅពាក់កណ្តាលសប្តាហ៍បន្ទាប់ ក៏ត្រូវប្រើប្រាស់ឈ្មោះកីឡដ្ឋាននោះ ទៅជា The City of Manchester Stadium ជំនួសវិញដែរ។ វាមិនត្រឹមតែអនុវត្តលើឈ្មោះកីឡដ្ឋានទេ ទៀតសោតសូម្បីឈ្មោះក្លឹប ក៏ត្រូវប្តូរដែរ ក្នុងករណីជាប់ឈ្មោះម្ចាស់ឧបត្ថម្ភដោយប្រការណាមួយ ជាឧទាហរណ៍ចុងក្រោយ Red Bull Salzburg ក្លឹបមកពីអូទ្រីស គ្រប់ប្រកួតនៅក្របខ័ណ្ឌអឺរ៉ុបខាងលើ គឺតម្រូវឲ្យប្តូរមកជា FC Salzburg វិញ ប្រសិនចង់មានឈ្មោះលេង។
ចុងក្រោយពាក់ព័ន្ធនឹងរឿងគ្មានអ្នកគាំទ្រ Bayern សូម្បីម្នាក់ នៅ Arsenal Stadium យប់មិញ គឺមកពីការដាក់ពិន័យរបស់ UEFA ទៅលើក្លឹបយក្សអាល្លឺម៉ង់ បន្ទាប់មានអ្នកគាំទ្រខាងពួកគេ បង្កើតចលាចលកាលពីប្រកួតវគ្គ ១៦ ក្រុម ទល់ Lazio លើករណីគប់ភ្លើងកាំជ្រួចចូលទៅក្នុងទីលាន។
ក្លឹបត្រូវរងពិន័យព្យួរឈ្មោះអ្នកគាំទ្រទាំងអស់មួយប្រកួតបន្ទាប់ ដែលចំការប្រកួតយប់មិញ ហើយរងពិន័យប្រាក់ ៤០ ០០០ អឺរ៉ូផ្សេងទៀត។ យ៉ាងណានៅប្រកួតបន្ទាប់ក្នុងទីក្រុង Munich ប្រទេសអាល្លឺម៉ង់ គឺអ្នកគាំទ្រទាំងអស់ នឹងអាចត្រលប់មកចូលរួមដូចទឹកបាក់ទំនប់វិញហើយ៕
ប្រភព៖ បរទេស