ជាបុគ្គលល្បី បើនិយាយអំពីឱកាសកើបប្រាក់ចំណូលក៏ងាយរកបានទៅតាមនោះ តែពាក់ព័ន្ធនឹងហានិភ័យនៃបញ្ហានានា ក៏ជាទូទៅរមែងមានខ្ពស់ជាងបណ្តាជនសាមញ្ញផងដែរ។ គ្រប់ពេលទម្លាក់ចុងប៊ិចស៊ីញ៉េលើកិច្ចព្រមព្រៀងណាមួយហើយ បុគ្គលនោះត្រូវប្រាកដថា នឹងមិនល្មើស ឬរំលងលើលក្ខខណ្ឌណាមួយជាដាច់ខាត មិនដូច្នោះទេ នឹងត្រូវទទួលរងការពិន័យ ឬឈានដល់ការផ្តាច់ចោលកុងត្រាខាតប្រាក់វាលលានត្រឹមមួយពព្រិចភ្នែក។
ដូចករណីអតីតជើងញាក់ប្រេស៊ីលជំនាន់ចាស់ Ronaldinho ពិតជាធ្លាប់បានធ្វើខុស ចំពោះដៃគូសហការឧបត្ថម្ភធំ គឺក្រុមហ៊ុន Coca-Cola កាលពីជាង ១២ ឆ្នាំមុន រួចវាក៏ជាមេរៀនសម្រាប់យុវជនជំនាន់ក្រោយ ឲ្យមានការប្រុងប្រយ័ត្នខ្ពស់ផងដែរ។
សារថយក្រោយទៅខែកក្កដា ឆ្នាំ ២០១២ កំឡុងពេលឈរជើងឲ្យក្លឹបប្រេស៊ីល Atletico Mineiro គ្រានោះ Ronaldinho បាននឹងកំពុងជាប់កុងត្រាជាមួយ Sponsor ខ្នាតយក្ស គឺក្រុមហ៊ុនភេសជ្ជៈ Coca-Cola ដែលក្នុងមួយឆ្នាំ លោកអាចទទួលបានប្រាក់ ៥០០ ០០០ ផោន ឬប្រហែល ៧៦០ ០០០ ដុល្លារអាមេរិក លើសុពលភាពផុតកំណត់នៅឆ្នាំ ២០១៤។
ដល់ហើយនៅតុសន្និសីទសារព័ត៌មានឲ្យក្លឹបអាណាព្យាបាល Ronaldinho ក៏បានមកអង្គុយដោយខ្វះការពិនិត្យគ្រប់ជ្រុងជ្រោយ ត្រង់នៅលើតុមានភេសជ្ជៈ Pepsi ចំនួន ២ កំប៉ុងនៅពីលើនោះ ដែលនេះជាក្រុមហ៊ុនគូប្រជែងធំបំផុតរបស់ Coca-Cola។
បើតាមដឹងពេលនោះ ក៏ដោយសារ Mineiro ជាក្លឹបទទួលបានការ Sponsor ពីក្រុមហ៊ុន Pepsi តែវាផ្ទុយស្រឡះអំពី Ronaldinho ដែលទទួលប្រាក់ពីខាង Coca-Cola។ ថាការផ្តិតយករូបភាពពីអ្នកកាសែតទៅ ជាប់យីហោដទៃចំពោះមុខកីឡាករ អ្វីដែលកាន់តែហួសចិត្តគឺ ខ្សែប្រយុទ្ធក្រឡុកជំនាញជើងស្តាំ ក៏ថែមទាំងលើកអកភេសជ្ជៈ Pepsi អស់បន្តិចថែមទៀត កំឡុងពេលឆ្លើយឆ្លងសំណួរ។ កាលនោះមើលទៅវាដូចជាការភ្លេចភ្លាំងមួយពេលរបស់កីឡាករ ព្រោះធម្មតាគ្មាននរណាចង់ទៅខាតបង់ប្រាក់ចំណូលយ៉ាងដូច្នោះទេ។
តែច្បាប់គឺច្បាប់ គ្រប់យ៉ាងបានកំណត់លើក្រដាសកុងត្រារួចរាល់អស់ហើយ រំលងតែប៉ុន្មានថ្ងៃបន្ទាប់ ស្រាប់តែនាយកផ្នែកទីផ្សាររបស់ Coca-Cola លោក Marcelo Pontes បានចេញមុខមកបកស្រាយថា៖ “ការដែលកីឡាករបានរំលេចវត្តមាន ជាមួយនឹងកំប៉ុង Pepsi វាពិតជារឿងអាម៉ាស់សម្រាប់ក្រុមហ៊ុនរបស់ពួកយើងដែលបានឧបត្ថម្ភទៅកាន់គេ”។
រីឯសេចក្ដីថ្លែងការណ៍របស់ក្រុមហ៊ុនឯណោះ៖ “Coca-Cola ទទួលស្គាល់អំពីតម្លៃនិងវិជ្ជាជីវៈរបស់ Ronaldinho តែយ៉ាងណារឿងហេតុដែលបានកើតឡើងពេលចុងក្រោយ វាពិតជាមិនអាចឲ្យពួកយើងបន្តភាពជាដៃគូសហការតទៅទៀត”។ សរុបជារួមមកមានន័យថា ដោយសារកាយវិការខុសឆ្គងតែប៉ុន្មាននាទីពេលនោះ បានសម្រេចឲ្យអតីតម្ចាស់ពាន Ballon d’Or និង World Cup ត្រូវខាតប្រាក់ចំណូលជាង ១,៥ លានដុល្លារ លើកុងត្រាសេសសល់ ២ ឆ្នាំ៕
ប្រភព៖ បរទេស