ចាប់ពីវគ្គនេះទៅគឺក្តៅ បើនិយាយពីទឹក គឺមុជកាន់តែជ្រៅហើយ ឆ្ពោះទៅវគ្គចុងបញ្ចប់ក្នុងការឈ្នះពានរង្វាន់ ដោយថ្មីថ្មោង UEFA ទើបតែសម្រេចការចាប់ឆ្នោតវគ្គ ៨ ក្រុម និង ៤ ក្រុមចុងក្រោយ នៅឯទីស្នាក់ការកណ្តាលនៃទីក្រុង Nyon ប្រទេសស្វីស។
ច្បាប់នៃការផ្គូផ្គងក្លឹបត្រូវជួបគ្នា ចាប់ពីវគ្គ ១/៤ ផ្តាច់ព្រ័ត្រ គឺលែងអនុវត្តច្បាប់ហាមឃាត់ក្លឹបមកពីពូល ឬមកពីប្រទេសតែមួយ មិនឲ្យជួបគ្នាទៀតហើយ ផ្ទុយទៅវិញ បើកបាឡុងគ្រាប់បាល់ប៉ះខាងណា គឺកំណត់ជួបខាងនោះ ឥតអាចប្រកែកបាន។ ចំណោមសមាសភាពក្លឹបឈរឈ្មោះទាំង ៨ សុទ្ធសឹងស្ថិតក្នុងការយល់ឃើញរបស់ Cristiano Ronaldo តាំងពីដើមរដូវកាល ថាជាក្លឹបមានភាគរយខ្ពស់បង្អស់ នឹងឈ្នះជើងឯក នៅទីក្រុងឡុង វគ្គផ្តាច់ព្រ័ត្រនាខែមិថុនាខាងមុខ។
យើងសារថយក្រោយនូវសម្រង់សម្តី តារាឆ្នើមវ័យ ៣៩ ឆ្នាំ ធ្លាប់បានលើកឡើង៖ “ការឈ្នះជើងឯករបស់ Man City គឺជាអ្វីដែលពួកគេសក្តិសមនឹងសម្រេចបាន ពោលតាំង ២ ឆ្នាំមុនមកម្ល៉េះ ខ្ញុំពេញចិត្តរបៀបនៃការលេងរបស់ពួកគេ នេះក៏មានឱកាសនឹងអាចឈ្នះ UCL ម្តងទៀតដែរ និយាយអំពីបេក្ខភាព City តែងតែមានឈ្មោះ ហើយដូចគ្នា Bayern Munich និង Real Madrid”។
ជាលទ្ធផលការចាប់ឆ្នោតវគ្គ ៨ ក្រុម Champions League រដូវកាល ២០២៣/២៤ មានដូចតទៅនេះ៖
- Arsenal Vs Bayern Munich
- Atletico Madrid Vs Dortmund
- Real Madrid Vs Man City
- PSG Vs Barcelona
គួរឲ្យដឹងថា ព្រឹត្តិការណ៍លំដាប់ពានអឺរ៉ុបដែលសេសសល់ក្លឹបនៅអេស្ប៉ាញ ៣ អង់គ្លេស ២ អាល្លឺម៉ង់ ២ និងបារាំង ១ កំណត់យកកាលបរិច្ឆេទប្រកួតជើងទីមួយនាថ្ងៃទី ០៩/១០ មេសា និងជើងទីពីរ ១៦/១៧ មេសា ហើយវគ្គពាក់កណ្តាលផ្ដាច់ព្រ័ត្រជើងទីមួយ នាថ្ងៃទី ៣០ មេសា/០១ ឧសភា និងជើងទីពីរ ០៧/០៨ ឧសភា ស្របពេលវគ្គផ្ដាច់ព្រ័ត្រ នាថ្ងៃទី ០១ មិថុនា ឆ្នាំ ២០២៤ នៅឯកីឡដ្ឋាន Wembley Stadium សុទ្ធសឹងតែនឹងមានផ្សាយបន្តផ្ទាល់លើទំព័រ CTS SPORTS៕
ប្រភព៖ បរទេស