ប៉ះទង្គិចពាក្យសម្តីនឹងអតីតអ្នកចាត់ការនៅក្លឹបមេ Manchester United គឺ Erik ten Hag បានធ្វើឲ្យអាជីពរបស់តារាឆ្នើមវ័យក្មេង Jadon Sancho ហាក់ក្រឡាប់ចាក់ធ្លាក់ចុះមួយរំពេច តែត្រឹមរយៈពេលខ្លី កីឡាករក៏អាចស្រោចស្រង់ស្ថានភាពត្រលប់មកល្អប្រសើរវិញ ជាមួយទ្រនំចាស់ Borussia Dortmund នៅឯទឹកដីប្រទេសអាល្លឺម៉ង់ ដ្បិតក្នុងលក្ខខណ្ឌខ្ចីជើង។
បញ្ជាក់ម្តងទៀត បារម្ភបងប្អូនខ្លះមិនទាន់បានដឹង ករណីកីឡាករអង់គ្លេស បានជ្រើសការផ្ទេរពី Dortmund មក United ក្នុងតម្លៃកប់ពពក ៨៥ លានអឺរ៉ូ កាលរដូវក្តៅ ឆ្នាំ ២០២១ ហើយគេមិនជាលេចធ្លោអីនោះទេ នៅ Old Trafford ដ្បិត ៨២ ប្រកួត រកបានត្រឹម ១២ គ្រាប់និង Assist ៦ លើក។ ដល់តែចុងឆ្នាំ ២០២៣ ផ្តើមកើតភាពចម្រូងចម្រាស់នឹងគ្រូធំ ten Hag ក៏នាំឲ្យ Sancho កាន់តែខ្សត់ឱកាស ហើយបង្ខំចិត្តចាកចេញមកកាន់ទ្រនំចាស់ និងឈរជើងទល់សព្វថ្ងៃ តែបានបង្កើតឥទ្ធិពលទៅជាសញ្ញាល្អ ដូចការចង់បានរបស់ខ្លួន។
នេះកីឡាករដែលជាដុំភក់ក្នុងក្រសែភ្នែកមនុស្សមួយចំនួននៅ United គេបានប្រែក្លាយជាដុំពេជ្រក្នុងចិត្តបងប្អូនអ្នកគាំទ្រ Borussia Dortmund ជាពិសេស ក៏បន្ទាប់តែការបង្ហាញទម្រង់លេងដ៏ល្អទាំងនៅ Bundesliga និង UEFA Champions League ជាក់ស្តែងលទ្ធផលសំខាន់ទើបបញ្ចប់យប់មិញ គេចូលរួមចំណែករកបានមួយគ្រាប់ ដឹកម្ចាស់ដី Signal Iduna Park ទម្លាក់ភ្ញៀវ PSV យកបានកៅអីឆ្ពោះទៅវគ្គ ៨ ក្រុមទៀតផង។
ជាងនេះប្រយុទ្ធស្លាបវ័យ ២៣ ឆ្នាំ ក៏បានឈ្នះពានឯកត្តជននាមកីឡាករល្អបំផុត ឬ MOTM ប្រចាំការប្រកួត រួចទទួលបានសម្លេងសាទរហ៊ោកញ្ជ្រៀវ ពីអ្នកគាំទ្រក្នុងដីដ៏កក់ក្តៅ ប្រៀបដូចជាការប៉ូវបេះដូង ក្រោយជួបរឿងមិនល្អនៅរយៈកាលមុន។ សរុប ៧ ប្រកួតចុងក្រោយនៅ UCL ក្នុងទឹកដី Dortmund ទាំងកាលឈរជើងលើកដំបូងផង Sancho អាចរកបាន ៤ គ្រាប់និង Assist ៣ លើកឯណោះ។
យ៉ាងណាតាមការបញ្ជាក់កន្លងមកពីភាគីខាងក្លឹប Dortmund ថាបើ United ទាមទារតម្លៃខ្ពស់ពេក គឺក្លឹបគ្មានលទ្ធភាពនឹងទាញយក ខ្សែប្រយុទ្ធជំនាញជើងស្តាំត្រលប់មកវិញឡើយ ព្រោះលទ្ធភាពខ្ទង់ចំណាយសព្វថ្ងៃគឺមានទាប មិនហ៊ានស្រមៃខ្ពស់ពេកនោះទេ។
ចំពោះសាមីខ្លួន Sancho មានការចុះផ្សាយពីប្រភពជាច្រើន រួមទាំង Fabrizio Romano ថាគេពិតជាចង់បន្តនៅ Dortmund តទៅទៀត តែគ្រប់យ៉ាងវាស៊ីសងលើការចរចាទៅតាមលក្ខខណ្ឌផ្ទេរចេញត្រឹមត្រូវតាមច្បាប់បាល់ទាត់ ហើយក៏មិនអាចគេចផុតពីការជជែកតម្លៃរវាងភាគីក្លឹបអាណាព្យាបាល ឬភាសាសាមញ្ញ យើងហៅថាចូលចែចូវ។
ជាមួយកុងត្រាសេសសល់ដល់ចុងខែមិថុនា ឆ្នាំ ២០២៦ មានការចុះផ្សាយ United នឹងព្រមលក់ចេញ Sancho ក្នុងតម្លៃចន្លោះ ៤០ ទៅ ៥០ លានផោន នេះមានន័យពួកគេមិនព្រមទទួលយកការខាតបង់ក្រោម ៥០ ភាគរយជាដាច់ខាត។
ឆ្លើយតបមកវិញ ចំពោះ Dortmund ក៏ប្រហែលនឹងមិនអាចទទួលយកតម្លៃនេះ ដ្បិតគ្រាលក់ចេញបាន ៧២ លានផោន ម្ល៉េះក្លឹបក៏ចង់រក្សាលុយចំណេញមួយភាគធំ ហើយតួលេខល្បាក់ ៣០ ទៅ ៤០ លានផោន អាចជាការផ្តល់ឲ្យ United ខ្ពស់បំផុតហើយ តាមអ្វីដែលខ្លួនហ៊ាន។ អ៊ីចឹងដំណើរការចរចាបែបណា យើងនឹងចុះផ្សាយបន្តទៀតនៅពេលក្រោយ៕
ប្រភព៖ បរទេស