រូបមួយសន្លឹកនេះ ដែលទំព័រធំ CTS Sport បានបង្ហោះចែករំលែក ហាក់កំពុងនាំរឿងទៀតហើយ ពោលបានផ្ទុះការវែកញែកឥតឈប់ ខ្លះទៅក៏ផ្ញើជាសារអបអរចង់ឃើញវាកើតឡើង តែខ្លះក៏បារម្ភចង់ឲ្យ Barcelona គេចផុត ព្រោះក្រែងលត្រូវរែកទុក្ខធ្ងន់ប្លុងការឈឺចាប់រាប់ឆ្នាំដូចមុនម្តងទៀត។
លទ្ធផលចៃដន្យដូចគេរៀបពិតជាបានកើតឡើង នៅកំឡុងពេល ៤ ឆ្នាំមុននិង ៤ ឆ្នាំក្រោយ រវាងគូ Napoli ទល់ Barcelona ត្រង់ថយក្រោយទៅរដូវកាល ២០១៩/២០ នាវគ្គ ១៦ ក្រុមពានរង្វាន់ UEFA Champions League នេះដែរ កាលពីជើងទី ១ ក្រុមសងខាងលេងស្មើ ១-១ លុះដល់ជើងទី ២ អ្នកមានបុណ្យ ដឹកនាំដោយអ្នកចាត់ការលោក Qique Setien កាលនោះ បានយកឈ្នះ ៣-១ ទៅលើក្លឹបដឹកនាំដោយអ្នកចាត់ការលោក Gennaro Gattuso លុះឆ្លងទៅវគ្គបន្ទាប់ការលេងដោយបិទទ្វារកីឡដ្ឋាន ទល់ Bayern Munich វគ្គ ៨ ក្រុមចុងក្រោយ លទ្ធផលប្រវត្តិសាស្ត្រដ៏ភ្ញាក់ផ្អើលបានកើតឡើង គឺ Barcelona បរាជ័យក្រោមថ្វីជើង ២-៨ ឬ ៨-២ ជាពាក្យពីរឃ្លាដែលអ្នកគាំទ្រទន្ទេញជាប់មាត់ទល់សព្វថ្ងៃ។
ដល់តែថ្ងៃនេះ វេលានេះ លទ្ធផលនៃដេប៉ាចាស់បានរំលេចឡើងម្តងទៀត ហាក់ដូចនិស្ស័យគេរៀបរៀងឡើង នាំឲ្យអ្នកគាំទ្រ ពិតជាមិនអាចទន្ទឹងរង់ចាំដល់ល្ងាចថ្ងៃសុក្រ ទី ១៥ មិនា ជាកាលបរិច្ឆេទចាប់ឆ្នោតក្លឹបត្រូវប៉ះគ្នានាវគ្គ ១/៤ ផ្ដាច់ព្រ័ត្រ និងពាក់កណ្ដាលផ្ដាច់ព្រ័ត្រ។ ជាការពិតលទ្ធផលក្នុងឆ្នាំ ២០២៤ ឬ ៤ ឆ្នាំក្រោយនេះ នៅជើងទី ១ ក៏ Napoli បានស្មើ ១-១ ទល់ Barcelona ហើយទើបបញ្ចប់ជើងទី ២ យប់មិញ នៅដី Camp Nou ដដែលទៀត ក៏ Barcelona យកឈ្នះ ៣-១ នាំឲ្យសរុបទាំងពីរជើង ៤-២ ដូចលទ្ធផលកើតឡើងកាលឆ្នាំ ២០២០ បេះដាក់។ អ៊ីចឹងតាមតម្រុយ តាមហេតុដែលបានកើត សង្ស័យណាស់ សង្ស័យតែទេវតារៀបឲ្យគូប្រជែងចាស់ ត្រូវវិលមកប៉ះគ្នាជាថ្មី។
យ៉ាងណាតាមមតិអ្នកគាំទ្រមួយភាគធំ ហាក់មិនញញើតនឹងឲ្យគូនេះជួបគ្នាទេ ត្រង់ខ្លះជឿជាក់លើ Barcelona ថាឆ្នាំនេះពួកគេល្អ មិនដូចសារមុនឡើយ ខណៈ Bayern ក៏មិនជាលេចធ្លោខ្លាំងអីពេកដែរ ដ្បិតកំពូលក្លឹបនៅ Bundesliga សព្វថ្ងៃ ដែលគេរាប់ចូល គឺ Bayer Leverkusen ឯណោះ។
មួយវិញទៀត មានការដាក់ភាពជឿជាក់លើភាគរយខ្ពស់ ថាអ្នកមានបុណ្យនឹងអាចសងលទ្ធផលត្រលប់មកវិញ បើមិន ៨-២ ក៏អាចយកឈ្នះ ទម្លាក់ Bayern ឲ្យស្គាល់ជាតិចាញ់ថាវាជាឈឺចាប់យ៉ាងណាដែរ នៅការប្រកួតនាដើមខែមេសាបន្ទាប់។ ឆ្ងាញ់បំផុតគឺម៉ាស៊ីនបញ្ចប់ទី Robert Lewandowski ដែលក្លឹបអាល្លឺម៉ង់ធ្លាប់មាន ក៏សព្វថ្ងៃឈរឈ្មោះតំណាងឲ្យក្លឹបយក្សនៅតំបន់កាតាឡូញ៉ាឯណេះ។
ភ្ជាប់ទៅរឿងចុងក្រោយ កុំឲ្យខាតពេលបងប្អូន យើងសុំបន្ថែមពាក់ព័ន្ធកាយវិការគួរឲ្យគោរពរបស់យុវជននៅ Camp Nou យប់មិញបន្តិច ត្រង់បន្ទាប់អាជ្ញាកណ្ដាលផ្លុំកញ្ចែបញ្ចប់ការប្រកួត សមាជិកគ្រប់គ្នារបស់ Xavi Hernandez បានរត់មកលោតអបអរពេញទីលាន តែ Gavi ជាខ្សែបម្រើឈរជើងក្រៅទីលាន ជួបបញ្ហារបួសគេត្រឹមដើរប៉ាក់ប៉ើកយឺតៗប៉ុណ្ណោះឯង ជារួមព្យាយាមចង់លោតតែមិនអាចលោតផុតពីដី។
ឃើញបែបនោះ Fermin Lopez មានអាយុបង Gavi មួយឆ្នាំក៏ស្រាប់តែរត់ទៅចាប់លើក Gavi មកអបអរឲ្យបានលោតជាមួយនឹងមិត្តឯទៀតដែរ នាំឲ្យកាយវិការនោះ ផ្ទុះការចាប់អារម្មណ៍ លាន់មាត់សរសើរពេញបណ្តាញសង្គមពីសំណាក់បងប្អូនអ្នកគាំទ្រ ថាក្មេងៗនៅ Barca ពិតជាស្រលាញ់យកចិត្តទុកដាក់នឹងគ្នាបានល្អណាស់៕
ប្រភព៖ បរទេស