ជើងក្រោមមានអ្នកចាំទី មានជញ្ជាំងការពារ រីឯប្រអប់លើមានប្រយុទ្ធជួរមុខ ចាំឱកាសបញ្ចប់គ្រាប់បាល់ ហើយចន្លោះស្នូលកណ្តាលនោះ ពិតជាមិនអាចមើលរំលង ត្រង់ក៏មានពួកគេខ្លះបានចូលរួមចំណែកធំសឹងគ្រប់ការប្រកួត ពោលហៅបានជាពហុជំនាញ Assist ក៏ប្រសព្វ បត់ទៅការស៊ុតក៏ពោរពេញដោយបច្ចេកទេសមិនណយ។
CTS SPORTS លើកឈ្មោះខ្សែបម្រើ ៣ រូប ដែលកំពុងពេញ Carry ក្រុមមួយទំហឹង ហើយរមែងបង្កើតផ្លែផ្កាជាគ្រាប់បាល់ ឬ Assist ឬការបង្កើតឱកាស Create Chance សំខាន់ៗសឹងគ្រប់ការប្រកួត។ និយាយជារួមក្នុងក្រុមឲ្យតែមានគេមួយ គឺល្មមនឹងអាចបន្លាច ក្រឡុកចិត្តគូប្រជែងបានហើយ៖
៣) Kevin de Bruyne
ស្តាប់ទៅប្រហែលដូចជាលឿនពេក ការដែលយើងលើកឈ្មោះខ្សែបម្រើសញ្ជាតិបែលហ្សិកមកក្នុងបញ្ជីនេះ តែបើក្រឡេកមើលស្ថិតិក្រោយត្រលប់ពីរបួសថ្មីថ្មោង គ្រូគណិត KDB ពិតជាសក្ដិសមនឹងទទួលបានការសរសើរ។
តើអ្នកដឹងទេ ក្រោយតែរយៈពេលប៉ុន្មានប្រកួត ឈរជើងបានជាង ៣០០ នាទី De Bruyne គេរកបាន ១ គ្រាប់ ហើយ Assist ដល់ទៅ ៦ លើក។ ជាមួយបច្ចេកទេសនៃភាពឈ្លាសវៃ ការសម្លឹងឃើញឆ្ងាយលើទីលាន ក៏ដល់ថ្នាក់មនុស្សយន្ត Erling Haaland ពោលពាក្យសរសើរឥតដាច់ពីមាត់ថា ការបញ្ជូនរបស់រៀមច្បងខាងលើ រាប់ជាការបញ្ជូនដ៏ល្អឥតខ្ចោះ ហើយរាល់ពេលបាល់នៅនឹងជើង Kevin គឺយើងដឹងមុនហើយថានឹងមានអ្វីខុសប្លែក។
២) Cole Palmer
ជាអតីតដុំថ្មដែល Man City បោះបង់ ឥឡូវ Chelsea ស្រង់ឡើងមកច្នៃកាត់ជាគ្រាប់ពេជ្រត្រឹមតែរយៈពេលខ្លី។ កីឡាករលេងតំណែងបម្រើរូបនេះ ក្នុងរដូវកាលដំបូង ក៏ថ្ពក់យកបានបេះដូងអ្នកគាំទ្រតោខៀវមួយទំហឹងបាត់ទៅហើយ ត្រង់សឹងគ្រប់ការប្រកួត តែងកើតមានចំណែកគ្រាប់បាល់របស់គេ។
៣១ ប្រកួត សរុប Goal+Assist មានដល់ទៅ ២៣ គ្រាប់ ហើយថ្មីថ្មោងចុងក្រោយបង្អស់ នៅការ Assist ២ ជើងក្នុងប្រកួតទោលយកឈ្នះ Crystal Palace ៣-១ កាលពីយប់មិញ។ ចំណុចដែលពិតជាមិនអាចមើលរំលងយុវជនកម្ពស់បាន ១,៨៩ ម៉ែត្រ គឺត្រង់ល្បឿនរបស់គេ និងបច្ចេកទេសកាត់បាល់ឆ្លងជើងដ៏ឈ្លាសវៃកម្រកើតមាននៅ Stamford Bridge។
១) Jude Bellingham
អ្នកចុងក្រោយនេះ ក៏កាន់តែមិនអាចរាប់រំលងក្នុងបញ្ជី ៣ រូបយើងលើកមកនិយាយ បើទោះបី Bellingham ទើបតែជួបបញ្ហារបួស ទាមទារការសម្រាកពេលទៅមុខជិត ១ ខែ។ ស្ថិតក្នុងអាយុទើបតែ ២០ ឆ្នាំ នេះគឺជាខ្សែបម្រើល្អដាច់គេហើយសព្វថ្ងៃ ប្រចាំលីគកំពូលទូទាំងតំបន់អឺរ៉ុប បន្ទាប់ ២៩ ប្រកួតសរុប រកបាន ២០ គ្រាប់និង Assist ៨ លើក។
បច្ចុប្បន្នគេក៏ជា Top Scorer ប្រចាំក្របខ័ណ្ឌ La Liga មាន ១៦ គ្រាប់ ដែលសមិទ្ធផលនេះ គួរអរគុណជាពិសេសដល់កីឡាករសំខាន់ៗពូកែចែកបាល់ពីខាងក្រោម ហើយម្ដងម្កាលដាក់ Bellingham ជាប្រយុទ្ធបញ្ឆោត។ យើងនឹងរង់ចាំមើលបន្តទៅទៀត ដ្បិតអី Bellingham ដែលជាខ្សែបម្រើ កំពុងប្រដេញកំណត់ត្រាកីឡាកររកបានគ្រាប់បាល់ច្រើនបំផុតនៅ La Liga រដូវកាលដំបូងជាមួយ Real Madrid ដោយសព្វថ្ងៃពីក្រោមឈ្មោះ Ronaldo Nazario មាន ២៥ គ្រាប់ និង Cristiano Ronaldo មាន ២៦ គ្រាប់៕
ប្រភព៖ បរទេស