ក្លឹបអាល្លឺម៉ង់ដែលមានអាយុកាលចំណាស់បង្អស់មួយ ដល់ទៅ ១១៩ ឆ្នាំ គឺ FC Schalke 04 ពេលចុងក្រោយកំពុងស្ថិតក្នុងខ្សែបន្ទាត់គ្រោះថ្នាក់ ប្រឈមខ្ពស់អាចនឹងត្រូវបាត់ឈ្មោះចេញពីពិភពបាល់ទាត់ ប្រសិនពេលវេលាសេសសល់មិនអាចស្រោចស្រង់ស្ថានការណ៍ត្រលប់មកវិញបាន។
នេះបន្ទាប់ការធ្លាក់ចេញពីលីគកំពូល Bundesliga នៅរដូវកាលមុន មកកាន់លីគលំដាប់ពីរ 2. Bundesliga ហើយចូលដល់ជុំទី ១៩ ក្លឹបធ្វើមិនបានល្អទាល់តែសោះ បន្តធ្លាក់ទម្រង់ គុណបរាជ័យផ្ទួនៗកម្រឃើញឈ្នះ បច្ចុប្បន្នឈរលេខរៀងទី ១៥ មាន ២០ ពិន្ទុស្មើនឹងក្លឹបពីរផ្សេងទៀតស្ថិតនៅតំបន់ត្រូវកាត់ឈ្មោះ។
ក្លឹបដឹកនាំដោយអ្នកចាត់ការលោក Karel Geraertsនៅសល់ត្រឹម ១៤ ប្រកួតទៀតក្នុងដៃ ដែលមានន័យថា ការយក ៣ ពិន្ទុនៅប្រកួតនីមួយៗគឺពិតជាចាំបាច់ ត្រង់វាពាក់ព័ន្ធនឹងអាយុជីវិតនៃក្លឹប ហើយមានតែពីរឃ្លា ដែលឥតអាចគេចផុតត្រូវទទួលយកខាងមុខ ១) គឺបន្តរស់រាន ២) គឺលេចបាត់ពីពិភពបាល់ទាត់។
ចំណុចទី ១ កត្តាដែលអាចឲ្យពួកគេបន្តរស់រានទៅមុខ ចាំបាច់ក្លឹបត្រូវតែស្តារទម្រង់លេងឡើងវិញ ពោលទាមទារមិនឲ្យធ្លាក់ចេញពីលីគលំដាប់ទីពីរនៅបិទរដូវកាល។ រីឯកត្តាចាក់ដោតអាចនាំឲ្យ ក្លឹបម្ចាស់ដី VELTINS-Arena ត្រូវបាត់ឈ្មោះចេញពីក្របខ័ណ្ឌកំពូលទាំងឡាយ គឺប្រសិនណាបិទរដូវកាលធ្លាក់ឈ្មោះនៅខ្សែបន្ទាត់ក្រហម សម្រេចកាត់ឈ្មោះនោះឯង។
ប្រិយមិត្តប្រាកដជាឆ្ងល់ ចុះហេតុអ្វីក្លឹបផ្សេងមិនអី បើធ្លាក់ពីលីគ ២ ក៏បន្តទៅលីគ ៣ ទៅ ក្រែងលរដូវកាលបន្ទាប់អាចស្រោចស្រង់ត្រលប់មកល្អវិញ? តែនេះករណី Schalke 04 គឺមិនអាចឡើយ ក៏ព្រោះតែទំហំនៃប្រាក់បំណុលដែលក្លឹបជាប់ជំពាក់ វាលើសលប់ហួសប្រមាណដល់ទៅ ១៦៥ លានអឺរ៉ូ ហើយស្ថានភាពហិរញ្ញវត្ថុដ៏អាក្រក់នេះ លុះត្រាតែឈរនៅលីគ ២ ទើបអាចមានលទ្ធភាពកាត់កងសងទៅរួច ជាក់ស្តែងដូចប្រាក់ចំណូលពីការលក់សិទ្ធផ្សព្វផ្សាយឲ្យប៉ុស្តិ៍ទូរទស្សន៍ ទទួលបានដល់ទៅ ២០ លានអឺរ៉ូ ខណៈនៅលីគ 3.Liga ពួកគេអាចមានត្រឹម ១០ ភាគរយនៃតួលេខនោះប៉ុណ្ណោះ។
ជាការសម្រេចតាមក្បួនច្បាប់បាល់ទាត់អាល្លឺម៉ង់ គឺនឹងមិនអាចផ្តល់ឲ្យអាជ្ញាប័ណ្ណឈរឈ្មោះជាក្លឹបបាល់ទាត់ក្នុងលីគលំដាប់ទី ៣ ឡើយ ក៏ព្រោះហេតុផលលើកឡើងខាងលើ ពាក់ព័ន្ធកត្តាប្រាក់បំណុលច្រើនហួសពីតួលេខអាចរំពឹងរកបានមកវិញ។
ដូច្នេះបើធ្លាក់ទៅក្នុងស្ថានភាពនោះ ក៏សម្រេចថា Schalke 04 នឹងត្រូវចាប់ផ្តើមជាថ្មីឡើងវិញពីចំណុច ០ ហើយប្រើប្រាស់ឈ្មោះជាក្លឹបថ្នាល មិនមែនឈ្មោះក្លឹបផ្លូវការដូចសព្វថ្ងៃ។ បន្តបន្ទាប់ត្រូវអភិវឌ្ឍខ្លួនពីមួយទៅមួយរដូវកាលឡើងពីការប្រកួតប្រជែងនៅក្រៅក្របខ័ណ្ឌអាជីព ពោលគ្រាន់តែគិតក៏ស្មុគស្មាញដែរ។
រួចចុងក្រោយសួរថា ចុះលក្ខខណ្ឌកីឡាករនិងអ្នកចាត់ការមានមុខមានមាត់កំពុងឈរជើងនៅទីនោះ នឹងគិតបែបណា? វាស៊ីសងលើការចរចាថានឹងបន្តនៅ ឬចាកចេញ តែតាមការជឿជាក់ ភាគច្រើនដែលពួកគេនៅសល់សមត្ថភាព ភាពល្បីល្បាញ ក៏នឹងជ្រើសទៅរកទ្រនំថ្មីមិនខាន ដើម្បីតែបន្តភាពនឹងធឹងក្នុងអាជីពបាល់ទាត់របស់ខ្លួន៕
ប្រភព៖ បរទេស