ជាការពិតបាល់ទាត់ពឹងលើគុណភាព ទេពកោសល្យលើទីលានប្រកួត តែក្រៅពីកត្តាអស់នោះ បណ្តាកីឡាករនិងអ្នកចាត់ការជាច្រើនក៏ជឿលើសំណាង ឬប្រផ្នូលល្អអាក្រក់មុនការប្រកួតផងដែរ។ មានទម្លាប់មួយ ដែលទទួលស្គាល់ថា Lionel Messi និង Cristiano Ronaldo ដ្បិតម្ខាងជាជនជាតិអាហ្សង់ទីននៅអាមេរិកខាងត្បូង និងម្ខាងជាព័រទុយហ្គាល់នៅអឺរ៉ុប ក៏ពួកគាត់រក្សាទម្លាប់ជឿគោរពដូចគ្នា ឥតហ៊ានជម្នះឡើយ។
នោះគឺការប៉ះពានរង្វាន់មុនការផ្លុំកញ្ចែចាប់ផ្តើមប្រកួត ទម្លាប់ស្តេចបាល់ទាត់ទាំងពីរ ដាច់ខាតមិនយកដៃទៅប៉ះវាឡើយ សឹងតែពេលខ្លះ ឥតហ៊ានដាក់ក្រសែភ្នែកសម្លឹងផង។ យើងទៅមើលតារាឆ្នើមវ័យ ៣៦ ឆ្នាំ ធ្លាប់បានរៀបរាប់ប្រាប់ប៉ុស្តិ៍ ESPN អំពីដំណើរដើមទងរបស់ខ្លួន មុនការឈ្នះពាន FIFA World Cup 2022 នៅឯប្រទេសកាតារ ថាពិតជាបានអនុវត្តក្បួនខ្នាតមួយនោះពិតមែន។
មុនការប្រកួតវគ្គផ្តាច់ព្រ័ត្រ ទល់បារាំងចាប់ផ្តើម ម្ចាស់អាវលេខ ១០ អាហ្សង់ទីនរៀបរាប់ថា៖ “ក្នុងករណីនេះ ខ្ញុំអត់បានសូម្បីតែសម្លឹងទៅកាន់ពាន មានការលើកឡើងថាកុំឲ្យយើងប៉ះ កុំឲ្យយើងសម្លឹងទៅកាន់វាឲ្យសោះ នេះខ្ញុំបានអនុវត្តតាមគ្រប់យ៉ាងអស់ហើយ មិនប្រមាថរំលងទេ”។
នេះខុសពី Mbappe ដែលគេប្រទះឃើញមុនចូលទីលាន បានសំដៅទៅប៉ះពានរង្វាន់ជាមុន ត្រង់នេះ បែបគេគិតថាវាជាកម្លាំងចិត្ត ឬជាក្បួនទាក់យកសំណាង តែការគិតរបស់មនុស្សម្នាក់ៗគឺខុសគ្នា។ សម្រាប់ខ្សែប្រយុទ្ធឆ្នើមបារាំង ដ្បិតរកបាន Hat-trick ក៏ទីបញ្ចប់នៅចាញ់បាល់ប៉េណាល់ទី ក្រោមថ្វីជើងជម្រើសជាតិមកពីឡាទីន នាំឲ្យពួកគេបាត់បង់ឱកាសកាន់ពានពិភពលោក នៅប្រទេសកាតារ នាឯចុងឆ្នាំ។
បន្ថែមពី Messi រហូតដល់សម្រេចលទ្ធផលស៊ុតប៉េណាល់ទី យកឈ្នះមាន់គកបារាំង ទើបគេហ៊ានសំដៅទៅទីតាំងតម្កល់ពាននោះ លើកផង ថើបផង និយាយខ្សឹបប្រាប់ផង ហើយអត្ថន័យដែលអតីតខ្សែប្រយុទ្ធ Barcelona បញ្ជាក់គឺ៖ “ខ្ញុំបាននិយាយពាក្យ Hello ទៅកាន់នាង [នាងសំដៅទៅដល់ពានរង្វាន់] ខ្ញុំដើរចូល ហើយជាលើកដំបូងដែលបានឃើញនាង នាងប្រៀបដូចជាមានពន្លឺអ្វីម្យ៉ាងជះយ៉ាងចិញ្ចាច ហើយរះឡើង នេះពិតជាគួរឲ្យចាប់អារម្មណ៍ខ្លាំងណាស់”។
រំឭកថា ការឲ្យប្រផ្នូលមុននេះ ក៏ Messi មិនហ៊ានប្រមាថដូចគ្នាកាលនៅ Copa America 2021 ដែលអាចជាផ្នែកមួយជួយឲ្យលោកឈ្នះជើងឯកប្រចាំទ្វីបកាលនោះ។
ឥឡូវយើងទៅមើល Ronaldo បើទោះបីមិនទាន់បានឈ្នះពាន World Cup តែពាន EURO ពាននៅក្លឹបជាច្រើនផ្សេងទៀត ក៏លោកបានហែលកាត់ស្គាល់ជ័យជម្នះមិនចេះតិចដែរ។ កត្តាមួយក្នុងចំណោមការខិតខំប្រឹងប្រែង និងការសហការមិត្តរួមក្រុម ក៏ដូចជាគ្រូបង្វឹក សម្រាប់ CR7 បានជឿលើអប្បិយជំនឿពាក់ព័ន្ធនឹងការហាមប៉ះពានជាមុនដូចគ្នា។
ធ្លាប់ប្រាប់ទៅកាន់ FIFA កាលពីជាង ៦ ឆ្នាំមុន៖ “ខ្ញុំអត់ដែលទម្លាប់ប៉ះពានរង្វាន់មុនជាដាច់ខាត់ គឺអត់ដែលទេ ព្រោះជឿថាវានាំសំណាងអាក្រក់មកដល់យើង ខ្ញុំពិតជាចង់ឈ្នះពានរង្វាន់នេះ វាជាក្តីស្រមៃមួយ តែក៏ទាមទារការខិតខំខ្លាំងណាស់ដែរ”។ ជាការលើកឡើង មុនប្រកួត FIFA Confederation Cup សម័យកាលចុងក្រោយ ២០១៧ ក្នុងប្រទេសរុស្ស៊ី ដែលអាល្លឺម៉ង់ឈ្នះជើងឯក ហើយព័រទុយហ្គាល់ទទួលបានត្រឹមលេខ ៣៕
ប្រភព៖ បរទេស