បន្ទាប់ឆ្លងកាត់វគ្គជម្រុះចម្រាញ់ក្នុងពូល ទីបំផុតការប្រជែងពានរង្វាន់ AFC Asian Cup 2023 ក៏បានឈានចូលមកដល់វគ្គ ១៦ ក្រុម ដែលនឹងចាប់ផ្ដើមផ្សាយបន្តផ្ទាល់នាល្ងាចថ្ងៃអាទិត្យស្អែកនេះលើទំព័រ CTS SPORTS។ ៨ គូដែលត្រូវប៉ះគ្នាសុទ្ធតែពិសេស ហើយក៏នឹងត្រូវមាន ៨ ក្រុមឆ្លងទៅកាន់វគ្គបន្ទាប់ ១/៤ ផ្តាច់ព្រ័ត្រ។
បន្ថែមពីការទស្សនារកក្រុមចាញ់ឈ្នះ CTS SPORTS ក៏សូមបន្ថែមចំណុចគួរឲ្យចាប់អារម្មណ៍មួយចំនួនដែលអ្នកត្រូវដឹង ដើម្បីញាំងឲ្យរសជាតិនៃការទស្សនាកាន់តែឆ្ងាញ់ទៅតាមនោះ៖
៨) អូស្ត្រាលី ប៉ះ ឥណ្ឌូណេស៊ី
ជួបគ្នាវេលាម៉ោង ០៦:៣០ នាទីល្ងាច ថ្ងៃអាទិត្យ ទី ២៨ មករា ដោយរំឭកស្ថិតិសរុបឆ្លង ១៨ ប្រកួតខាងអូស្ត្រាលី ឈ្នះដល់ ១៤ ស្មើ ៣ និងឥណ្ឌូណេស៊ីឈ្នះ ១។ លើកចុងក្រោយនៃការជួបគ្នា ជម្រើសជាតិនៅអូស្យានីបានយកឈ្នះ ១-០ កាលពីឆ្នាំ ២០១០ ក្នុងវគ្គជម្រុះបឋម Asian Cup តែនេះវាបានកត់ត្រាជាលើកដំបូង ដែលអូស្ត្រាលីត្រូវមកប៉ះគូប្រជែងអាស៊ីអាគ្នេយ៍នៅប្រកួតផ្លូវការម្ដងទៀត ក្រោយខកខានតាំងឆ្នាំ ២០០៧ គ្រាយកឈ្នះថៃ ៤-០។ បញ្ជាក់អូស្រ្តាលីឈរលេខរៀងទី ២៥ ខណៈឥណ្ឌូណេស៊ីលេខ ១៤៦ នៅ FIFA Ranking។
៧) តាហ្ស៊ីគីស្ថាន ប៉ះ អារ៉ាប់រួម
នេះជាការជួបលក្ខណៈផ្លូវការលើកដំបូងរវាងជម្រើសជាតិទាំងពីរ ដ្បិតប្រកួតសព្វមួយដងត្រឹមមិត្តភាព ២ លើកមុននោះ គឺអារ៉ាប់រួមឈ្នះ ១ ស្មើ ១។ ទៅមើលចំណាត់ថ្នាក់ FIFA Ranking ខាងតាហ្ស៊ីគីស្ថានឈរលេខ ១០៤ និងអារ៉ាប់រួមឈរលេខ ៦៤។ កាលបរិច្ឆេទគូនេះ វេលាម៉ោង ១១:០០ នាទីយប់ថ្ងៃអាទិត្យ ទី ២៨ មករា។
៦) អ៊ីរ៉ាក់ ប៉ះ ហ្សកដានី
ប៉ះគ្នាសរុបជិត ៥០ លើក តែប្រវត្តិនៅពាន Asian Cup គឺមួយលើកគត់ កាលនៅឆ្នាំ ២០១៥ ដែលអ៊ីរ៉ាក់យកឈ្នះទាំងតានតឹង ១-០។ បច្ចុប្បន្នអ៊ីរ៉ាក់ឈរលេខ ៦៣ រីឯហ្សកដានីលេខ ៨៧ នៅ FIFA Ranking។ កាលបរិច្ឆេទគូនេះ វេលាម៉ោង ០៦:៣០ នាទីល្ងាច ថ្ងៃចន្ទ ទី ២៩ មករា។
៥) កាតារ ប៉ះ ប៉ាឡេស្ទីន
នេះជាការកត់ត្រាលើកដំបូងដូចគ្នារវាងប្រទេសទាំងពីរ នៅវគ្គចាញ់ធ្លាក់ Asian Cup យ៉ាងណាក៏ទទួលស្គាល់កាតារមានប្រៀបជាង ត្រង់ចំណាត់ថ្នាក់ Ranking នៅ FIFA ឈរលេខ ៥៨ ស្របពេលប៉ាឡេស្ទីន ឈរលេខ ៩៩ ឯណោះ។ កាលបរិច្ឆេទជួបគ្នាវេលាម៉ោង ១១:០០ នាទីយប់ ថ្ងៃចន្ទ ទី ២៩ មករា។
៤) អ៊ូបេគីស្ថាន ប៉ះ ថៃ
ដូចគ្នានឹងគូខាងលើ ត្រង់ពួកគេនេះ ក៏មកជួបលើកដំបូងដែរ នាវគ្គចាញ់ធ្លាក់ Asian Cup ដ្បិតប្រកួតជម្រុះបឋមដើមឆ្នាំ ២០២៣ ខាងអ៊ូបេគីស្ថាន ជាអ្នកយកជ័យជម្នះ។ ជម្រើសជាតិនៅអាស៊ីកណ្តាលឈរលេខ ៦៨ រីឯជម្រើសជាតិនៅអាស៊ីអាគ្នេយ៍ឈរលេខ ១១៣។ កាលបរិច្ឆេទគូនេះ ម៉ោង ០៦:៣០ នាទីល្ងាច ថ្ងៃអង្គារ ទី ៣០ មករា។
៣) អារ៉ាប៊ីសាអ៊ូឌីត ប៉ះ កូរ៉េខាងត្បូង
ខានជួបគ្នាតាំងឆ្នាំ ២០០៧ បន្ទាប់ការស្មើ ១-១ ដល់តែមកជួបជាថ្មីសារនេះ ក៏មានអ្នកចាត់ការកំពូលនៅដឹកនាំដូចគ្នា។ លោក Roberto Mancini ដឹកនាំជម្រើសជាតិឈរលេខ ៥៦ អត់ធ្លាប់តតាំងគ្នាទេទល់ Jurgen Klinsmann ដឹកនាំជម្រើសជាតិឈរលេខ ២៣ ដ្បិតអីកាលនៅអាជីពជាកីឡាករជួបគ្នាម្តង ក៏ស្មើ ១-១ គ្រា EURO 1988។ កាលបរិច្ឆេទគូនេះ វេលាម៉ោង ១១:០០ នាទីយប់ ថ្ងៃអង្គារ ទី ៣០ មករា។
២) បារ៉ែន ប៉ះ ជប៉ុន
ជួបគ្នា ១៣ ដងកន្លងមក បារ៉ែនស្គាល់ឈ្នះ ២ លើកគត់ សល់ប៉ុន្មានគឺស្មើ ១ ចាញ់ ៩។ ឥឡូវមកត្រូវជួបចំពេលសាំម៉ូរ៉ៃខៀវឡើងឈរជាលំដាប់លេខ ១ អាស៊ី និងលេខ ១៧ នៅចំណាត់ថ្នាក់សកល ខណៈជម្រើសជាតិខ្លួន ឈរលេខ ៨៦ ឯណោះ។ កាលបរិច្ឆេទគូនេះ ម៉ោង ៦:៣០ នាទីយប់ ថ្ងៃពុធ ទី ៣១ មករា។
១) អ៊ីរ៉ង់ ប៉ះ ស៊ីរី
ខានជួបគ្នា ៤៤ ឆ្នាំនៅ Asian Cup ឥឡូវបានមកកាត់កងគ្នាម្តងទៀតហើយ ត្រង់សារនេះ ត្រូវតែមានមួយឈ្នះជាចាំបាច់។ យ៉ាងណាលើកចុងក្រោយនៅវគ្គជម្រុះបឋម World Cup 2022 ឃើញថាអ៊ីរ៉ង់ឈ្នះទាំងពីរជើង ៤-០។ រំឭកអំពីចំណាត់ថ្នាក់អ៊ីរ៉ង់ឈរលេខ ២១ ខណៈស៊ីរីឈរលេខ ៩១ នៅ FIFA Ranking។ កាលបរិច្ឆេទគូនេះ វេលាម៉ោង ១១:០០ នាទីយប់ ថ្ងៃពុធទី ៣១ មករា៕
ប្រភព៖ បរទេស