ខ្សែបម្រើឆ្នើមAndres Iniesta កំពុងធ្វើដំណើរជាមួយប្រធានក្លឹប Vissel Kobe ទៅប្រទេសជប៉ុន ដើម្បីធ្វើការចុះកុងត្រាលេងជាផ្លូវការហើយ។
Iniesta បានប្រកាសចាកចេញពី FC Barcelona ក្រោយពីរួមរស់ជាមួយក្លឹបនេះអស់រយៈពេល២២ឆ្នាំ។ ការចាកចេញនេះ មានក្លឹប២ដែលគេត្រូវសម្រេចចិត្តជ្រើសរើសគឺ ក្លឹបនៅប្រទេសចិន និងក្លឹបនៅប្រទេសជប៉ុន។ នៅយប់មិញនេះ កីឡាករជម្រើសជាតិអេស្ប៉ាញរូបនេះបានបង្ហោះរូបមួយសន្លឹកនៅលើយន្ដហោះជាមួយលោកHiroshi Mikitani ប្រធានក្លឹប Vissel Kobe ទៅហើយ។
មិនត្រឹមតែបង្ហោះរូបបែបនេះ Iniesta ថែមទាំងសរសេរទៀតថា៖ “ដំណើរឆ្ពោះទៅផ្ទះថ្មីរបស់ខ្ញុំ ជាមួយមិត្តភក្ដិ”។ មួយឃ្លានេះបានបញ្ជាក់គ្រប់គ្រាន់ហើយថា វីរបុរសក្រុមអ្នកមានបុណ្យពិតជាសម្រេចចិត្តទៅលេងនៅជប៉ុនហើយ។
Vissel Kobe បច្ចុប្បន្នកំពុងតែឈរនៅចំណាត់ថ្នាក់លេខ៧ក្នុងតារាងលីគកំពូលរបស់ប្រទេសជប៉ុន។ ហើយក្លឹបមួយនេះ មានកីឡាករថៃម្នាក់កំពុងលេងផងដែរគឺខ្សែការពារ Theerathon Bunmathan ខ្ចីជើងពីក្រុម Muangthong United។ អតីតកីឡាករក្រុម Arsenal គឺ Lukas Podolski ក៏កំពុងលេងនៅក្លឹបនេះដែរ៕ប្រភព៖ DailyMail