កន្លងមកធ្លាប់តែលឺគេនិយាយអំពី Ajax, Benfica និង Dortmund ជាដើម ថាជារោងចក្រផលិតធនធានកីឡាករ ត្រង់ជារៀងរាល់ឆ្នាំអាចកើបផលចំណេញរាប់សិបលានពីបាល់ទាត់។ យ៉ាងណាងាកមកចំណោមក្លឹបធំ ក៏មានដែរ គ្រាន់តែមានតិច បើយើងនិយាយអំពីការនាំចូល អាចមកកើតផលល្អ ហើយដល់ពេលលក់ចេញទៅវិញ ក៏នៅតែអាចចំណេញប្រាក់នោះ។
អធិរាជស Real Madrid ពិតជាមិនអាចរំលងក្នុងការលើកមកនិយាយ ពាក់ព័ន្ធនឹងប្រធានបទខាងលើ។ PEAK SPORTS សង្ខេបដំណើររឿងតារាឆ្នើមគួរឲ្យចងចាំ ៥ រូបក្នុងប្រវត្តិសាស្រ្តក្លឹបអេស្ប៉ាញ៖
៥) Mesut Ozil
នៅរដូវក្តៅ ឆ្នាំ ២០១០ ក្លឹបដែលទើបចាត់តាំងប្រធានថ្មីថ្មោងលោក Florentino Perez បានមើលឃើញយុវជនកំពុងពេញលេងនៅឯក្លឹបអាល្លឺម៉ង់ Werder Bremen គឺ Ozil។ ដំណើរផ្ទេរចូលមកកាន់ Real Madrid ក្លឹបចាយអស់ត្រឹម ១៨ លានអឺរ៉ូ តែសមិទ្ធគេសម្រេចបាន ហៅថាលើសលប់ត្រង់ ១៥៩ ប្រកួត អាចរកបាន ២៧ គ្រាប់ និង Assist ដល់ ៨១ លើក។
បុរសភ្នែកក្តាមជំនាញចែកបាល់វែងខ្លី ចាយពេលនៅទីនោះជាង ៣ ឆ្នាំ ហើយក៏ជ្រើសការផ្ទេរបន្តទៅកាន់ Arsenal មានតម្លៃខ្លួនគុណលើសជាពីរ ចូលដល់ ៤៧ លានអឺរ៉ូ។ ត្រង់នេះមានន័យ Real Madrid យកប្រើកើតការហើយ ក៏ចំណេញលុយ ២៩ លានចូលហោប៉ៅទៀត។
៤) Alvaro Morata
ករណីជាមួយកីឡាករអេស្ប៉ាញគឺ Madrid ចំណេញ ២ តង់ ត្រង់ដើមឡើយ Morata ជាយុវជនថ្នាលនៅឈុត Castilla ដល់តែរដូវក្តៅ ឆ្នាំ ២០១៤ ក៏ Juventus ពេញចិត្តទិញយកក្នុងតម្លៃ ២០ លានអឺរ៉ូ។ អភិវឌ្ឍខ្លួននៅទីនោះពីរឆ្នាំ សេះបង្កង់ចំណេញបាន ១០ លាន លក់មកឲ្យក្លឹបចាស់វិញ តែស្តេចសឆ្លាត មិនសុខៗចេះតែយកខុសឡើយ នេះទិញមកវិញ ៣០ លាន កែខៃសមត្ថភាពគេមួយឆ្នាំ បែរអាចលក់ទៅវិញក្នុងឆ្នាំ ២០១៧ ជូន Chelsea នៅតម្លៃដល់ ៦៦ លានអឺរ៉ូ។
Morata សាងកេរ្តិ៍ឈ្មោះល្អខ្លាំងនៅ Castilla ហើយគ្រាមកឈុតធំ ក៏មិនអន់នោះដែរ ត្រង់រកបាន ៣១ គ្រាប់ Assist ១១ លើកមុនចាកចេញទៅតោខៀវ ជាកន្លែងកើតការខាតបង់ខុសពីដំណើរវិនិយោគរបស់ Madrid។ ដូចនេះករណីប្រយុទ្ធប្រអប់ខាងលើ បូកដកចុះឡើងក្លឹបចំណេញ ៥៦ លានអឺរ៉ូ។
៣) Casemiro
មិនបាច់រៀបរាប់ច្រើនអំពីស្ថិតិ ត្រឹមហៅឈ្មោះកីឡាករប្រេស៊ីល ប្រាកដណាស់អ្នកគាំទ្រស្គាល់ច្បាស់ណាស់ទៅហើយ ក្នុងរជ្ជកាលមាសគេលេងតំណែងបម្រើការពារ ឬ DMF ឲ្យស្តេចស។ អំពីដំណើរផ្ទេរចេញចូល គឺក្លឹបចំណេញកប់ក្តោង ត្រង់ការទិញយកពីរលើក ម្តងពី Sao Paulo ម្តងពី FC Porto សរុបចាយត្រឹម ២១ លាន ដល់តែលក់ចេញទៅវិញសរុបបានដល់ ៧៨,១៥ លាន ម្ល៉េះមានន័យក្លឹបចំណេញ ៥៧,១៥ លានអឺរ៉ូ។
២) Angel di Maria
ស្គាល់ជាតិគ្រប់ពាននៅអេស្ប៉ាញ និងសូម្បីលំដាប់ពានអឺរ៉ុប UCL កាលទៅរួមរស់ជាមួយ Real Madrid ៤ ឆ្នាំ ក្នុងតម្លៃផ្ទេរ ៣៣ លានអឺរ៉ូ។ ឆ្លៀតថែមស្ថិតិប្រយុទ្ធស្លាបសញ្ជាតិអាហ្សង់ទីនបន្តិច នេះល្អមិនចាញ់ Ozil ត្រង់ ១៩០ ប្រកួត រកបាន ៣៦ គ្រាប់ និង Assist ៨៥ លើក។
ស្តេចសគិតត្រូវក្នុងការអភិវឌ្ឍជើង Di Maria បន្ទាប់ប្រើប្រាស់គេ ៤ ឆ្នាំ ដល់ឆ្នាំ ២០១៤ លក់ចេញទៅវិញឲ្យ Man United បានដល់ ៧៥ លាន អ៊ីចឹងស្មើនឹងកើតផលចំណេញពីការផ្ទេរចំនួន ៤២ លានអឺរ៉ូ។
១) Cristiano Ronaldo
ករណី CR7 បើនិយាយតួលេខប្រាក់ចំណេញគឺមិនច្រើនទេ តែបើកាត់កងសមិទ្ធផលចូលរួមចំណែកជួយក្លឹប បូកពេលវេលាប្រើប្រាស់កីឡាករលើទីលាន នោះវាលើសលប់ឥតឧបមា ពោលលុយរយលានក៏ដូរមិនបានដែរ។
នៅរដូវក្តៅ ឆ្នាំ ២០០៩ បិសាចក្រហមព្រមលក់ Ronaldo ទៅឲ្យអធិរាជស ក្នុងតម្លៃកំណត់ត្រា ៩៤ លានអឺរ៉ូ។ ឆ្លងកាត់ពេលវេលាឈរជើង ៩ ឆ្នាំ លោកបានក្លាយជា Top Scorer ប្រចាំប្រវត្តិសាស្រ្តក្លឹប រកបានដល់ទៅ ៤៥០ គ្រាប់ ជាមួយនឹងកំណត់ត្រាហូរហែរាប់មិនអស់។
សឹងតែមិនចង់ជឿ ក្នុងវ័យ ៣៣ ឆ្នាំ Ronaldo អាចមានតម្លៃខ្លួនដល់ទៅ ១១៧ លានអឺរ៉ូ គ្រា Juventus ថ្ពក់យក ក្នុងឆ្នាំ ២០១៨។ នេះក្លឹបនៅតែចំណេញប្រាក់ ២៣ លាន តែងាកទៅក្លឹបបន្ទាប់សេះបង្កង់ ត្រងយកតារាចាស់វស្សាព័រទុយហ្គាល់ត្រឹម ៣ ឆ្នាំ បែរកើតការខាតបង់ដល់ ១០០ លានអឺរ៉ូទៅវិញ៕
ប្រភព៖ បរទេស