អាយុទើប ២៥ ឆ្នាំ តែ Kylian Mbappe ត្រូវបានគេប៉ាន់ប្រមាណ អាចមានទ្រព្យសម្បត្តិជិត ២០០ លានដុល្លារ ដែលទំហំនេះវាធំធេងឥតឧបមា ហើយក៏រំពឹងអាចកើនដល់ខ្ទង់ពាន់លាន ដូច Cristiano Ronaldo ដូច Lionel Messi ប្រសិនអាចបន្តទម្រង់លេងល្អ និងបន្ថែមប្រជាប្រិយភាពកាន់ឆ្នាំទៅមុខ។
យ៉ាងណានៅបទសម្ភាសន៍ថ្មីៗនេះ ខ្សែប្រយុទ្ធជាប់រហស្សនាម “កូនអណ្ដើកតូចបារាំង” បានសង្កត់ធ្ងន់ដល់បញ្ហាកំពុងជួបប្រទះសព្វថ្ងៃ គឺម្តងម្កាលធ្លាប់មានភាពធុញថប់អារម្មណ៍ ត្រង់ទៅណាក៏មិនបានដូចចិត្ត ក៏ព្រោះតែភាពល្បីល្បាញរបស់ខ្លួន បាំងអស់ភាពរីករាយដែលខ្លួនធ្លាប់ហែលកាត់កាលនៅជីវិតសាមញ្ញ។
សួរថានរណាមិនស្គាល់ Mbappe នៅទូទាំងប្រទេសបារាំង ព្រោះដល់ថ្នាក់សូម្បីលំដាប់នាយករដ្ឋមន្រ្តីប្រចាំផ្ទៃប្រទេស ក៏ធ្លាប់លើកឈ្មោះអតីតយុវជនមានតម្លៃផ្ទេរខ្ពស់ដាច់គេក្នុងលោករូបនេះ មកនិយាយផងដែរ។ គេកាន់តែផ្តើមផ្ទុះភាពល្បីល្បាញខ្លាំង នៅល្បាក់ឆ្នាំ ២០១៨ ក្រោយក្លាយជាម្ចាស់ជើងឯក FIFA World Cup ហើយ ២០២២ ក៏បន្ថែមមួយកម្រិតទៀត ទោះត្រឹមនាមជាជើងឯករង។
ប្រាប់នៅកម្មវិធី Envoye Special កីឡាករ Top Scorer ប្រចាំប្រវត្តិសាស្ត្រក្លឹប PSG បានលើកឡើងយ៉ាងដូច្នោះថា៖ “ត្រឹមតែការទៅទិញនំប៉័ងនៅខាងក្រៅ ខ្ញុំត្រូវចាយលុយជាច្រើនដើម្បីធ្វើវា ដែលរឿងអស់នេះ វាសាមញ្ញបំផុតសម្រាប់មនុស្សធម្មតា និយាយត្រង់ទៅខ្ញុំពិតជាបានបាត់បង់នៅរសជាតិនៃការរស់នៅជាមនុស្សធម្មតា ខ្ញុំពិតជានឹកអារម្មណ៍បែបនោះខ្លាំងណាស់”។
មានការសួរនាំចាក់អារម្មណ៍ជ្រាលជ្រៅបែបនេះថា ចុះបើលោកមានពេល ៤៨ ម៉ោង ឬ ២ ថ្ងៃពេញ ក្នុងការដកឃ្លាពីបាល់ទាត់ ទៅណាមកណាដោយគេមិនស្គាល់មិនឃើញ តើលោកនឹងធ្វើអ្វីខ្លះ? ក៏ស្រាប់តែ Mbappe ឆ្លើយទាំងទឹកមុខញញឹមញញែម៖ “ពិតប្រាកដណាស់! ខ្ញុំនឹងចាយពេលវេលាទាំងអស់នោះ នៅខាងក្រៅ ខ្ញុំអាចនិយាយពាក្យនេះ ដោយមិនបាច់គិតច្រើនឡើយ”។
លោកបន្ត៖ “ទៅញុាំអាហារនៅហាងតាមដងផ្លូវ ទៅដើរលេងខាងក្រៅជាមួយមិត្តភក្តិខ្ញុំ ជប់លៀងដោយភាពស្ងប់ស្ងាត់ ដោយគ្មាននរណាមកតាមឃ្លាំមើល ហើយនៅព្រឹកបន្ទាប់ ញុាំអាហារលើដំបូលផ្ទះមើលព្រះអាទិត្យ ជីវិតសាមញ្ញៗបែបនេះ អ្នករាល់គ្នាអាចទទួលបានវាដោយងាយ ខណៈខ្ញុំក៏ពិតជាចូលចិត្តចង់បានបំផុត”។
រំឭកថារឿងនេះមិនត្រឹមតែកើតលើ Mbappe ម្នាក់ទេ កន្លងទៅទៀតសោតក៏ធ្លាប់កើតលើតារាឆ្នើម Cristiano Ronaldo ផងដែរ កាលកំពុងពេញល្បីខ្លាំងនៅ Real Madrid។
តារាឆ្នើមព័រទុយហ្គាល់ធ្លាប់បង្ហើបកាលពី ១៥ ឆ្នាំមុន៖ “ខ្ញុំអត់អាចចេញទៅកន្លែងសាធារណៈដោយស្រួលទេ ខ្ញុំគ្មានភាពឯកជនឡើយ ដូចនៅថ្ងៃឆ្លងឆ្នាំថ្មី ២០០៩ ខ្ញុំប្រាប់មិត្តភក្តិខ្ញុំគឺ Ricardo ថាចង់ចេញទៅក្រៅ យើងមិនអាចសម្ងំនៅផ្ទះបានទេ យើងក៏ទៅទិញឈុតតុបតែងបន្លំខ្លួនចូលទៅក្នុងបារឌីស្កូចំកណ្តាលទីក្រុង Madrid ហើយយើងព្រមព្រៀងគ្នាមុនថានិយាយតែភាសាអង់គ្លេសទេ ដើម្បីកុំឲ្យគេចាប់បាន”។
លោកបន្ត៖ “តែចៃដន្យពេលមួយ ខ្ញុំជ្រុលនិយាយភាសាព័រទុយហ្គាល់ ហើយមានមនុស្សម្នាក់ចាប់បាន និងមកខ្សឹបប្រាប់ខ្ញុំ ថាគេស្គាល់ខ្ញុំច្បាស់ហើយជា Cristiano បន្ទាប់មកក៏បុរសម្នាក់នោះ ប្រាប់គ្រប់គ្នានៅក្នុងបារ តែម្នាក់ៗមិនដាក់ការសង្ស័យខ្លាំងទេ ទើបយើងអាចរីករាយនៅទីនោះបាន ៣ ម៉ោង វាជាយប់ដ៏រីករាយបំផុតមួយសម្រាប់ជីវិតខ្ញុំ”។
ទាំងនេះបង្ហាញច្បាស់ថា ជីវិតអ្នកល្បីមិនស្រួលដូចយើងគិតទេ ជារួមដើម្បីប្តូរយកភាពស្រណុកសុខស្រួលលើគំនរទ្រព្យ កេរ្តិ៍ឈ្មោះ គឺត្រូវលាក់បាំងអារម្មណ៍និងការចង់បានសម្រាប់ជីវិតជាច្រើនចំណុច៕
ប្រភព៖ បរទេស