សព្វថ្ងៃនៅការប្រកួតបាល់ទាត់សឹងតែទូទាំងសកលលោក អាជ្ញាកណ្តាលសម្រេចប្រើប្រាស់តែ ២ កាតប៉ុណ្ណោះ គឺកាតលឿង ជាសារព្រមាន និងកាតក្រហម ជាការបណ្តេញចេញ។ នៅប្រកួតទោល ពិន័យកាតលឿង ២ ស្មើកាតក្រហម ១ វាជាច្បាប់បាល់ទាត់មានអាយុកាលរាប់ទសវត្សហើយក៏បន្តប្រើមកទល់បច្ចុប្បន្ន។
ងាកទៅមើលទម្រង់នៃកាតទាំងពីរពណ៌ដែលអាជ្ញាកណ្តាលហូតចេញពីហោប៉ៅលើកមកពិន័យកីឡាករ គឺមានទម្រង់ស្តង់ដារជារាងចតុកោណកែង វិមាត្រ ១១x៧ សង់ទីម៉ែត្រ។ ដល់តែងាកទៅប្រកួត FA Cup កន្លងទៅ បែរកើតរឿងភ្ញាក់ផ្អើល ត្រង់កាតក្រហមដែលអាជ្ញាកណ្តាលលើក បែរចេញជារាងរង្វង់ ដែលគ្នាយើងភាគច្រើនមិនធ្លាប់ជួបប្រទះពីមុនមក។
តើវាមានលក្ខណៈពិសេសអ្វី ធៀបនឹងកាតក្រហមរាងចតុកោណកែង ហើយមានហេតុផលអ្វីនៅពីក្រោយនោះ ទើបអាជ្ញាកណ្តាលជ្រើសរើសយកមកប្រើប្រាស់? សំណួររបស់អ្នកគាំទ្រ CTS SPORTS តែងមានចម្លើយផ្តល់ជូន នេះពួកយើងសូមឆ្លើយយ៉ាងខ្លី គឺវាគ្មានលក្ខណៈពិសេសដាក់ពិន័យតិចច្រើនជាងកាតទូទៅនោះទេ គ្រាន់ថាផ្តល់ប្រយោជន៍ងាយស្រួលចំណាំទៅវិញ សម្រាប់អាជ្ញាកណ្ដាល។
ប្រកួតស្មើ ១-១ រវាង Brentford និង Wolves សម្រាប់ខាងចចកបានបាត់បង់កីឡាករលេងតំណែងបម្រើ តាំងនាទីទី ៩ គឺ Joao Gomes។ ត្រង់នោះអាជ្ញាកណ្តាលលោក Tony Harrington បានហូតចេញកាតពណ៌ក្រហមយ៉ាងរហ័ស មកពិន័យបណ្តេញចេញសមាជិក Wolves ដែលវាមានទម្រង់ជារាងរង្វង់។
បើតាមការរៀបរាប់យ៉ាងក្បោះក្បាយពីប្រភពក្រៅស្រុក មូលហេតុគឺវាអាចជំនួយជួយដល់អាជ្ញាកណ្តាលក្នុងការស្ទាបទម្រង់កាតជាមុន សឹមហូតចេញ ដោយឥតចាំបាច់មើលច្រើន ធ្វើបែបនេះ ជៀសវាងការភ័ន្តច្រឡំដកខុសកាត នាំឲ្យកើតភាពស្មុគស្មាញនិងមន្ទិលសង្ស័យលើទីលាន។
បើតាមគណនី 1025Traveller លើគេហទំព័រ Reddit បានបញ្ចេញមតិថា ខ្លួនបានជួបអាជ្ញាកណ្តាលកីឡា Rugby លោក Andre Watson ដោយផ្ទាល់នៅខាងក្រៅ ហើយសួរចំៗក៏ Andre ឆ្លើយដូចគ្នា គឺមកពីធ្លាប់ទាញខុសកាត ឧទាហរណ៍ជួនខ្លះចង់ពិន័យកីឡាករនោះត្រឹមកាតលឿងទេ តែលឿនពេកបែរទៅចាប់កាតក្រហម ម្ល៉េះហើយមិនចង់បង្កកំហុស Error ជាថ្មី ទើបជ្រើសការប្រើកាតទម្រង់ផ្សេងគ្នាមួយជាចតុកោណកែង មួយជារង្វង់ ដើម្បីងាយចំណាំឥតបាច់មើលច្រើន កំឡុងពេលហូតចេញពីហោប៉ៅ។
រំឭកថា នេះមិនមែនជាលើកដំបូងទេ ដោយកន្លងមកក៏ធ្លាប់កើតមានរឿងស្រដៀងគ្នា ចេញពីអតីតអាជ្ញាកណ្តាលនៅ Premier League លោក Uriah Rennie ហើយនៅ FA Cup ទៀតសោតរដូវកាលមុន ក៏ Dean Whitestone ធ្លាប់លើកកាតក្រហមរាងមូល នៅប្រកួតក្លឹប Wrexham ស្មើ Sheffield United ផងដែរ៕
ប្រភព៖ បរទេស