ស្ថិតក្នុងពេលវេលាវិស្សមកាលរយៈពេលខ្លី ដល់ថ្ងៃទី ២៤ មករា ទើប Cristiano Ronaldo ទទួលភារកិច្ចត្រូវវិលមកជួយក្លឹប Al-Nassr ជាថ្មី ហើយបន្តបន្ទាប់មានតាំងពីជំនួបមិត្តភាពតូចធំ រួមទាំងការប្រជែងពានរង្វាន់នានាបន្តកន្ទុយគ្នាដល់បិទរដូវកាល។
យ៉ាងណាក្នុងឆ្នាំ ២០២៤ បើទោះបីកីឡាករព័រទុយហ្គាល់ផ្ទេរមកចូលរួមនៅក្លឹបក្នុងទឹកដីអាស៊ី តែតួនាទីក្នុងការឆ្ពោះទៅរកជ័យជម្នះគឺនៅតែមាន ហើយសុទ្ធតែបញ្ជីបេសកកម្មដាក់គោលដៅពានធំៗទៀតផង។ ត្រៀមឆ្លងចូលវ័យ ៣៩ ឆ្នាំ នៅថ្ងៃទី ០៥ ខែក្រោយ សម្រាប់ Ronaldo លោកអាចមានឱកាសកាន់ពាន ៥ ក្នុងឆ្នាំតែមួយនេះ៖
៥) ពាន Saudi Pro League
ដើរមកដល់ជុំទី ១៩ ហើយសម្រាប់ពានលីគកំពូលអារ៉ាប៊ីសាអូឌីត ត្រង់ Al-Nassr ឈរលេខ ២ បណ្ដោះអាសន្នមាន ៤៦ ពិន្ទុនៅពីក្រោយក្លឹបល្អដាច់គេ Al-Hilal មាន ៥៣ ពិន្ទុ។ អាចនិយាយបានថា Ronaldo ពិតជាបានចូលរួមចំណែកធំធេងជូនក្លឹប ជាក់ស្តែងដូចតួលេខគ្រាប់បាល់គឺនាំមុខតំណែង Top Scorer មាន ១៨ គ្រាប់។
ខ្សែប្រយុទ្ធជំនាញជើងស្តាំ ត្រូវរង់ចាំដល់ថ្ងៃទី ១៥ កុម្ភៈ សឹមវិលមកប្រកួតនៅ SPL ជាថ្មីទល់ Al Fateh។
៤) ពាន King Cup
រៀបចំឡើងដោយសហព័ន្ធបាល់ទាត់អារ៉ាប៊ីសាអូឌីត រាប់ជាពានមានអាយុកាលចំណាស់មួយ បង្កើតតាំងឆ្នាំ ១៩៥៧។ ក្នុងប្រវត្តិសាស្រ្ត Al-Nassr ធ្លាប់ឈ្នះពាននេះ ៦ សម័យ ដោយលើកចុងក្រោយនៅឆ្នាំ ១៩៩០។
យើងកំពុងរង់ចាំអ៊ុតមើល តើ Ronaldo អាចចូលរួមចំណែកកាន់ពាន King Cup ជាលើកដំបូងដែរឬយ៉ាងណា? ដំណើរការប្រកួតបានចូលមកដល់វគ្គពាក់កណ្តាលផ្តាច់ព្រ័ត្រ បន្ទាប់ក្លឹបដឹកនាំដោយអ្នកចាត់ការលោក Luis Castro យកឈ្នះទៅលើ Al-Shabab ៥-២ កាលពីវគ្គមុន។
៣) ពាន Saudi Super Cup
បើយើងគិតទៅពាននេះ ប្រហាក់ប្រហែលនឹង Community Shield នៅចក្រភពអង់គ្លេស។ ជារៀងរាល់ឆ្នាំមានតែគីឡូធ្ងន់ទាំង ៤ ចូលរួម ហើយឥឡូវ Ronaldo មានឈ្មោះនាមសមាជិក Al-Nassr ក៏រង់ចាំកាលបរិច្ឆេទប្រកួតមកដល់ពេលខាងមុខ។
២) ពាន AFC Champions League
ឈ្នះពានលីគកំពូលអារ៉ាប៊ីសាអូឌីតអត់ស្ទាវទេ តែបើអាចឈ្នះពានលំដាប់ទ្វីប ACL មួយនេះ បានហៅថាខ្លាំង។ ស្គាល់ហើយ UCL នៅអឺរ៉ុប ខណៈឆ្នាំ ២០២៤ នេះ CR7 ក៏មានឱកាសអាចស្គាល់រសជាតិជើងឯកប្រចាំទ្វីបអាស៊ី ត្រង់ Al-Nassr បានឡើងមកដល់វគ្គ ១៦ ក្រុម កំណត់ជួប Al Feiha នៅពាក់កណ្តាលខែក្រោយ។
១) ពាន EURO
៤ ពានដូចរៀបរាប់ខាងលើ ប្រសិនណា Ronaldo សម្រេចបានទាំងអស់ ម្ល៉េះក៏មិនទាន់ចប់ដែរ ត្រង់លោកអាចមានលទ្ធភាពបន្ថែមពានធំក្នុងអាជីពគឺ UEFA European Championship។ កាលសម័យ ២០១៦ ធ្លាប់បានឈ្នះម្តង ឥឡូវ ២០២៤ ក៏អាចមានឱកាសម្តងទៀត នាពាក់កណ្តាលឆ្នាំ ក្នុងទឹកដីម្ចាស់ផ្ទះអាល្លឺម៉ង់។
ក្នុងវគ្គចែកពូលផ្លូវការ UEFA ក៏ចាប់ឆ្នោតផ្គូផ្គងរួចរាល់ ដោយបញ្ចខែលក្រហមព័រទុយហ្គាល់ស្ថិតនៅពូល F ត្រូវប៉ះតួកគី សាធារណរដ្ឋឆេក និងជម្រើសជាតិមួយទៀតឆ្លងចេញពីវគ្គ Play-off អាចជាហ្សកហ្ស៊ី លុចហ្សំបួរ ក្រិក ឬកាហ្សាក់ស្ថាន។ សរុបមកជាមួយឱកាសដូចបានបង្ហាញ តើអ្នកគិតថា Ronaldo នឹងអាចកាន់ពានទាំង ៥ ក្នុងឆ្នាំតែមួយនេះ បានដែរឬយ៉ាងណា?
ប្រភព៖ បរទេស