អ្នកចាត់ការក្លឹប Manchester United លោក Erik ten Hag ត្រូវបានគេរាយការណ៍ថាចាប់អារម្មណ៍ក្នុងការចុះហត្ថលេខាលើអតីតខ្សែការពារក្រុម Chelsea និងបច្ចុប្បន្នលេងនៅ Barcelona គឺកីឡាករ Andreas Christensen។Christensen បានចូលរួមជាមួយក្រុម U18 របស់ Chelsea ពីក្រុម Brondby របស់ដាណឺម៉ាកក្នុងឆ្នាំ ២០១២ មុនពេលបង្ហាញខ្លួនលើកដំបូងនៅឆ្នាំ ២០១៥។ គាត់បានបង្ហាញខ្លួន ១៦១ ប្រកួតសម្រាប់ក្រុមតោខៀវ មុនពេលចាកចេញក្នុងនាមជាកីឡាករគ្មានតម្លៃខ្លួនកាលពីរដូវក្តៅមុន។

បន្ទាប់មកខ្សែការពារសញ្ជាតិដាណឺម៉ាករូបនេះបានចូលរួមជាមួយក្រុម Barcelona ហើយមានរដូវកាលដ៏ល្អមួយ ដោយបានបង្ហាញខ្លួនចំនួន ៣២  ប្រកួតក្នុងការប្រកួតនានា។ គាត់បានជួយពួកគេឈ្នះ La Liga និង Supercopa de Espana កាលពីរដូវកាលមុន។យោងតាម ​​El Nacional ទម្រង់របស់ Christensen បានទាក់ទាញចំណាប់អារម្មណ៍ពីអ្នកចាត់ការ Ten Hag របស់ក្រុម Manchester United។ បិសាចក្រហមថែមទាំងចង់ដេញថ្លៃ ៤០ លានអឺរ៉ូក្នុងរដូវក្តៅនេះ ប៉ុន្តែមិនអាចទៅរួច ដោយសារតែខ្សែការពារមិនចង់ចាកចេញពី Barcelona។

Barca ក៏ចង់លក់ Christensen ដោយសង្ឃឹមថានឹងរកប្រាក់ចំណេញលើកីឡាករដែលពួកគេបានចុះហត្ថលេខាដោយគ្មានតម្លៃខ្លួន។ ទោះបីជាយ៉ាងណា ក៏ដោយ ខ្សែការពារមិនព្រមចាកចេញទេ ហើយអ្នកចាត់ការ Xavi Hernandez ក៏ចាត់ទុកគាត់ជាកីឡាករសំខាន់របស់ក្រុមផងដែរ។ទន្ទឹមនឹងនេះដែរ Manchester United សង្ឃឹមថានឹងចែកផ្លូវជាមួយ Harry Maguire ដែលកាន់តែធ្លាក់ចុះទម្រង់លេង ចាប់តាំងពីការតែងតាំងរបស់ Ten Hag កាលពីរដូវក្តៅមុន។ ខ្សែការពារកណ្តាលសញ្ជាតិអង់គ្លេសបានចាប់ផ្តើមការប្រកួតត្រឹមតែ ១៦ ប្រកួតប៉ុណ្ណោះក្រោមការដឹកនាំរបស់អ្នកចាត់ការ សញ្ជាតិហូឡង់៕