ពិធីរត់ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ត្រូវប្រារព្ធធ្វើឡើងជាបន្តទៀត នៅទីក្រុងតាកាយតាយ ប្រទេសហ្វីលីពីន នាព្រឹកព្រលឹម ថ្ងៃទី២៧ ខែមីនា ឆ្នាំ២០២៣នេះ ក្រោមការសាទរពីរដ្ឋាភិបាលហ្វីលីពីន ព្រមទាំងគណៈកម្មាធិការជាតិអូឡាំពិក និងប្រជាជនហ្វីលីពីន។
ពិធីដែលបានធ្វើឡើងនៅវេលាម៉ោង ៧ព្រឹក (ត្រូវនឹងម៉ោង ៦ព្រឹកនៅកម្ពុជា) មានការអញ្ជើញចូលរួមដោយឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេសតំណាង CAMSOC, ឯកឧត្តម ផន ពៅ ឯកអគ្គរាជទូតកម្ពុជា ប្រចាំប្រទេសហ្វីលីពីន, លោក Abraham Tolentino ប្រធានគណៈកម្មាធិការអូឡាំពិកហ្វីលីពីន (POC), លោក Michael Barredo ប្រធានគណៈកម្មាធិការប៉ារ៉ាឡាំពិកហ្វីលីពីន និងឯកឧត្តមលោកជំទាវ ជាអង្គទូតនៃបណ្ដាប្រទេសអាស៊ានប្រចាំសាធារណៈរដ្ឋហ្វីលីពីន និងទាំងភ្ញៀវកិត្តិយសជាច្រើន។
ឯកឧត្តម ផន ពៅ ឯកអគ្គរាជទូតកម្ពុជា ប្រចាំប្រទេសហ្វីលីពីន បានមានប្រសាសន៍ថា៖«ព្រឹត្តិការណ៍ថ្ងៃនេះ ឆ្លុះបញ្ចាំងយ៉ាងល្អអំពីកិច្ចសហប្រតិបត្តិការជិតស្និទ្ធដែលប្រជាជនកម្ពុជា និងហ្វីលីពីន ជាពិសេសក្នុងទំនាក់ទំនងរវាងប្រជាជន និងប្រជាជន។ នេះក៏ជានិមិត្តរូបនៃការប្តេជ្ញាចិត្តរួមគ្នារបស់យើងក្នុងការស្រឡាញ់ និងពង្រឹងទំនាក់ទំនង និងកិច្ចសហប្រតិបត្តិការទ្វេភាគីរបស់យើងឱ្យកាន់តែរីកចម្រើន និងវិបុលភាពនៃប្រទេសទាំង២ និងសហគមន៍អាស៊ាន។ កីឡាពិតជារស់នៅក្នុងសន្តិភាពមែន! ជាចុងក្រោយ ខ្ញុំសូមជូនពរឱ្យអ្នកទាំងអស់គ្នា មានសុខភាពល្អ សុភមង្គល និងជោគជ័យ ហើយខ្ញុំសង្ឃឹមថាអ្នកនឹងមានពេលវេលាដ៏អស្ចារ្យនៅក្នុងប្រទេសកម្ពុជា ក្នុងអំឡុងការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣»។
ក្នុងឱកាសនោះផងដែរ បេសកជនពិសេសតំណាង CAMSOC ឯកឧត្តម ហោ សារុន បានសម្ដែងក្តីរីករាយ ដែលបានចូលរួមក្នុងពិធីដង្ហែព្រះអគ្គិជ័យកីឡា កម្ពុជា ឆ្នាំ២០២៣ នៅទីក្រុងតាកាយតាយ នៃសាធារណរដ្ឋហ្វីលីពីន។ ឯកឧត្តមក៏បានថ្លែងអំណរគុណដល់រដ្ឋាភិបាលហ្វីលីពីន ជាពិសេស គណៈកម្មាធិការអូឡាំពិកហ្វីលីពីន និងរដ្ឋបាលក្រុងតាកាយតាយ ដែលបានរៀបចំព្រឹត្តិការណ៍ដ៏សំខាន់បែបនេះឡើង។