ប្រភពនៅអាល្លឺម៉ង់បានចុះផ្សាយយ៉ាងច្បាស់ថាក្លឹប Bayern Munich បានសម្រេចចិត្តបណ្ដេញលោក Julian Nagelsmann ចេញពីតំណែងអ្នកចាត់ការក្រុមទៅហើយ ទាំងដែលសាមីខ្លួនមិនទាន់ទទួលបានដំណឹងផង។
កាលពីប្រកួតកន្លងទៅនេះ Bayern Munich លេងចាញ់ក្រុម Bayer Leverkusen និងឈរនៅត្រឹមចំណាត់ថ្នាក់លេខ២ប៉ុណ្ណោះក្នុងតារាង Bundesliga ។ បរាជ័យនោះ លោក Julian Nagelsmann បានបន្ទោសទៅលើកីឡាករខ្លាំង ហើយចោទពួកគេថាលេងដោយគ្មានកម្លាំងចិត្តក្នុងខ្លួនទាល់តែសោះ។ ខណៈដែលថ្នាក់ដឹកនាំក្លឹបវិញ ក៏មើលឃើញថានេះជាប្រកួតអន់បំផុតហើយសម្រាប់ក្រុម Bayern Munich ។ ចប់រឿងនេះទៅ ក៏ស្រាប់តែធ្លាយដំណឹងក្លឹបបណ្ដេញលោក Julian Nagelsmann ចេញតែម្ដង ទាំងដែលមិនទាន់ប្រាប់ទៅសាមីខ្លួនផង។
ប្រភពនៅអាល្លឺម៉ង់បញ្ជាក់ថាអ្នកចាត់ការវ័យ៣៥ឆ្នាំត្រូវបានដកតំណែង ហើយ Bayern Munich បានយកលោក Thomas Tuchel មកដឹកនាំក្រុមបន្ដហើយ។ ការប្រកាសផ្លូវការនឹងធ្វើឡើងនៅថ្ងៃសុក្រនេះតែម្ដង។ Bayern Munich ក្រោមការដឹកនាំរបស់លោក Nagelsmann មានភាគរយឈ្នះដល់ទៅ៧១%ឯណោះ ដោយឆ្លងកាត់៨៤ប្រកួត ឈ្នះ៦០ប្រកួត ឈ្នះពាន Bundesliga ម្ដង German Super Cup ២ដង៕