លោកជំទាវ ជា គឹមថា ឯកអគ្គរាជទូតកម្ពុជាប្រចាំនៅប្រទេសវៀតណាម បានមានប្រសាសន៍ថា កាលពីយប់ថ្ងៃទី២២ ខែមីនា ឆ្នាំ២០២៣ ក្រុមការងារទាំងអស់ ព្រមទាំងស្ថានទូត ក្រោមការដឹកនាំដោយផ្ទាល់ដោយលោកជំទាវ បានទៅទទួលពិធីដង្ហែភ្លើងគប់កីឡាស៊ីហ្គេមដោយផ្ទាល់ នៅអាកាសយានដ្ឋានអន្តរជាតិ ក្រោយពេលភ្លើងគប់កីឡានេះ បានធ្វើដំណើរទៅដល់ប្រទេសវៀតណាម ហើយការទទួលស្វាគមន៍នេះ គឺមានភាពល្អប្រពៃនិងកក់ក្ដៅបំផុត។
លោកជំទាវបានសង្កត់ធ្ងន់ថា «កាលពីយប់មិញហ្នឹង ខាងស្ថានទូត ដែលស្ថិតក្រោមការដឹកនាំរបស់នាងខ្ញុំផ្ទាល់ហ្នឹងគឺបានទៅទទួលដោយផ្ទាល់គណៈប្រតិភូ ដែលដឹកនាំដោយឯកឧត្ដម ហោ សារ៉ុន រដ្ឋលេខាធិការក្រសួងទេសចរណ៍ និងជាបេសកជនពិសេស នៃគណៈកម្មាធិការជាតិអូឡាំពិកកម្ពុជា ដោយមានកិត្តិយស និងក្ដីរំភើបយ៉ាងក្រៃលែង ដែលមានការចូលរួមពីសំណាក់ភាគីវៀតណាមដែរ ដែលមានលោកស្រីអគ្គនាយករងក្រសួងវប្បធម៌ ទេសចរណ៍ និងកីឡាវៀតណាម និងក្រុមការងាររបស់គាត់មួយក្រុមដែរ»។
លោកជំទាវឯកអគ្គរាជទូតបន្ថែមថា «ភាគីវៀតណាម ជាមួយស្ថានទូត បានទទួលស្វាគមន៍គណៈប្រតិភូយើងយ៉ាងកក់ក្ដៅ ដោយក្ដីរីករាយ ព្រោះថា ប្រទេសវៀតណាម ជាប្រទេសទី១ ដែលត្រូវដង្ហែភ្លើងគប់ស៊ីហ្គេម មុននឹងបន្តរត់ភ្លើងគប់ទៅកាន់ប្រទេសក្នុងតំបន់អាស៊ានដទៃទៀត។ ចំពោះការរៀបចំនេះ យើងទទួលបានការសហការ និងជិតស្និទ្ធបំផុតពីក្រសួងកីឡាទេសចរណ៍ និងវប្បធម៌របស់វៀតណាម ហើយមែនទែនទៅ ការរៀបចំនេះមិនមែនទើបតែចាប់ផ្ដើមទេ គឺយើងបានត្រៀមខ្លួន និងរៀបចំតាំងពីថ្ងៃប្រជុំជាមួយគណៈកម្មាធិការជាតិអូឡាំពិក កាលពីថ្ងៃទី៤ មីនា ហ្នឹងយើងខ្ញុំចាប់ផ្ដើមភ្លាមម្ល៉េះ»។