ខ្សែប្រយុទ្ធ Aleksandar Mitrovic របស់ក្រុម Fulham អាចនឹងជាប់ពិន័យច្រើនប្រកួត ចំពោះកាយវិការដែលរូបគេបានរុញអាជ្ញាកណ្ដាលរហូតដល់ទទួលបានកាតក្រហមទល់ក្រុមបិសាចក្រហម Manchester United ។
Mitrovic ជាអ្នករកបានគ្រាប់បាល់ឱ្យ Fulham នាំមុខទៅលើក្រុម Man Utd មុនក្នុងការប្រកួតកន្លងទៅ ប៉ុន្តែរូបគេក៏ទទួលបានកាតក្រហមផងដែរ ក្រោយពីច្រលោតទៅដាក់អាជ្ញាកណ្ដាលដែលបានផ្ដល់កាតក្រហមទៅឱ្យ Willian ។ ការរុញអាជ្ញាកណ្ដាលនេះអាចនឹងត្រូវ FA ពិន័យបន្ថែមទៀត អាចលើសពី៣ប្រកួតទៀត ព្រោះនេះជាកាយវិការមិនសមរម្យនោះទេចំពោះអាជ្ញាកណ្ដាល។
ចំពោះរឿងពិន័យកាតក្រហមនេះដែរ ខាង Fulham ក៏មានគម្រោងក្នុងការតវ៉ាវិញផងដែរ។ ពួកគេនឹងលើកយកករណីរបស់ Bruno ដែលធ្លាប់រុញអាជ្ញាកណ្ដាលក្នុងការប្រកួតទល់ Liverpool ដែរ តែមិនទទួលបានកាតអ្វីនោះទេ។ បញ្ជាក់ដែរថា FA មិនត្រឹមតែពិន័យទៅលើ Mitrovic នោះទេ ប៉ុន្តែអ្នកចាត់ការ Marco Silva ក៏នឹងទទួលការពិន័យដូចគ្នា៕