លោក Jamie Carragher បានប្រាប់ឱ្យក្លឹប Spurs បណ្ដេញលោក Antonio Conte ចេញពីតំណែងទៅ ក្រោយពីបុរសសញ្ជាតិអ៊ីតាលីនេះ និយាយរិះគន់កីឡាករ និងក្លឹបខ្លួនឯងដឹកនាំស្ទើរតែរាល់ការប្រកួតទៅហើយ។
បន្ទាប់ពីលេងស្មើជាមួយក្រុមSouthampton ក្នុងលទ្ធផល ៣-៣ នៅយប់មិញនេះ លោក Conte បានដាក់ការស្ដីបន្ទោសទៅលើកីឡាកររបស់ខ្លួនឯងទៀតហើយ។ លោកអះអាងថាកីឡាករក្រុម Spurs បច្ចុប្បន្នលេងមិនចង់ឈ្នះ មិនមានកំហឹង កម្លាំងចិត្តនៅក្នុងខ្លួននោះទេ។ ដូច្នេះហើយ ទើបបានជាលទ្ធផលក្រុមទាំងមូលមិនបានល្អ ហើយក៏ពិបាកក្នុងការប្រជែងពានរង្វាន់ដទៃផងដែរ។ ខណៈដែលនេះមិនមែនជាលើកទីមួយទេ ដែលអ្នកចាត់ការសញ្ជាតិអ៊ីតាលីនេះនិយាយបន្ទោសទៅលើកីឡាករខ្លួនឯង។
ក្រោយពីឃើញសម្ដីអ្នកចាត់ការនិយាយដដែលៗបែបនេះ ទើបបានជាលោក Carragher និយាយថា៖ “Conte មានចេតនាឱ្យក្លឹប Spurs បណ្ដេញគេចេញ។ Spurs គួរតែសម្រេចតាមបំណងគេហើយ និងគួរតែបណ្ដេញភ្លាមៗតែម្ដង។ គាត់និយាយថា Spurs មិនឈ្នះពានជាយូរមកនោះ គឺជារឿងត្រឹមត្រូវ ប៉ុន្តែអ្នកមិនគួរនិយាយរិះគន់ក្លឹបខ្លួនឯងកំពុងដឹកនាំបែបនេះឡើយ”៕