នៅព្រឹកថ្ងៃសៅរ៍នេះ បានកើតមានរឿងរ៉ាវវែកញែកពីសំណាក់អ្នកគាំទ្របាល់ទាត់លើបណ្តាញសង្គម ជុំវិញការចែករំលែកខុសការពិត ដែលថា Arsenal តាំងតែបង្កើតក្លឹបមក អត់ធ្លាប់មានឈ្មោះធ្លាក់ចេញពីលីគកំពូល ឬភាសាបច្ចេកទេសហៅថា “Relegated” នោះទេ។
ក៏មានបងប្អូនយើងមួយចំនួន បានចូលទៅបញ្ចេញមតិយោបល់ ដោយថា វាមិនមែនជាការពិត ហើយពាក់ព័ន្ធប្រធានបទនេះ CTS Sports ក៏សូមលម្អិតលើកមកបង្ហាញនូវទិន្នន័យច្បាស់ការ ឥតក្រឡៃបាន នោះគឺត្រង់ថា ក្លឹបមានមូលដ្ឋានក្នុងទីក្រុងឡុង បង្កើតឡើងអស់កាល ១៣៦ ឆ្នាំមួយនេះ ក្នុងប្រវត្តិសាស្ត្រគឺពិតជាធ្លាប់បានធ្លាក់ចេញពីក្របខ័ណ្ឌកំពូល ហើយកើតឡើងតែមួយលើកគត់។
នោះគឺតាំងពីរដូវកាល ១៩១២/១៣ គ្រាដែលលីគលំដាប់ទីមួយរបស់អង់គ្លេស ត្រូវបានគេហៅជា Football League First Division ដោយកាំភ្លើងធំ នៅមានឈ្មោះហៅថា ‘Woolwich Arsenal’។ ២០ ក្លឹបស្ថិតក្នុងការប្រកួតប្រជែងចំនួន ៣៨ ជុំ មាន ២ ក្លឹបតម្រូវត្រូវកាត់ឈ្មោះ គឺ Notts County និង Woolwich Arsenal ឈរនៅចំណាត់ថ្នាក់បាតតារាង មាន ១៨ ពិន្ទុ។
នៅរដូវកាលដដែលនោះ Sunderland ជាក្លឹបឈ្នះជើងឯក ស្របពេល Manchester United ឈរចំណាត់ថ្នាក់ទី ៤ Manchester City ចំណាត់ថ្នាក់ទី ៦ និង Liverpool ចំណាត់ថ្នាក់ទី ១២ ជាដើម។
ក៏ប៉ុន្តែបើយើងនិយាយតែនៅក្របខ័ណ្ឌ Premier League ចាប់តាំងការប្តូរឈ្មោះ នៅឆ្នាំ ១៩៩២ គឺជាការពិត Arsenal ស្ថិតក្នុងចំណោមក្លឹបទាំង ៦ មិនធ្លាប់ស្គាល់ពាក្យឈរបាតតារាង ដល់កាត់ឈ្មោះចេញនោះទេ។ ជាក់ស្តែងក្រៅពីក្លឹបធ្លាប់ដឹកនាំដោយលោក Arsene Wenger ក៏មានក្លឹបឯទៀត ដូច Chelsea, Everton, Liverpool, Tottenham Hotspur និង Manchester United។
ទោះជាយ៉ាងណា សម្រាប់ Arsenal ក៏នៅតែបានរក្សាទុកកំណត់ត្រាមិនគួរឲ្យជឿ គឺជាក្លឹបតែមួយគត់ក្នុងប្រវត្តិសាស្រ្តដែលបានឈ្នះពានមាស Premier League តំណាងឲ្យក្លឹបឆ្លងកាត់រដូវកាលទាំងមូល មិនស្គាល់ពាក្យថា ចាញ់។ តែបើរាប់ជារួម ចាប់តាំងការបង្កើតបាល់ទាត់នៅអង់គ្លេស គឺមានក្លឹបមួយផ្សេងទៀត នោះគឺ Preston North End ដែលសព្វថ្ងៃ ជាក្លឹបឈរនៅក្របខ័ណ្ឌលំដាប់ពីរ Championship។
យើងធ្វើការរំឭកទៅរជ្ជកាលមាសរបស់ Arsenal បន្តិច ដោយវាបានកើតឡើងកាល ១៩ ឆ្នាំមុន ពោលនៅរដូវកាល ២០០៣/០៤ នៅ Premier League ឆ្លងកាត់ ៣៨ ប្រកួត ឈ្នះ ២៦ ស្មើ ១២ និងចាញ់ ០។ ក្រោមការដឹកនាំរបស់គ្រូតាលោក Arsene Wenger ក៏ជួយឲ្យក្លឹបម្ចាស់ដី Emirate សាងកំណត់ត្រាកាន់ពានមាស មិនធ្លាប់កើតមាន ហើយមកទល់បច្ចុប្បន្នក៏មិនទាន់មានក្លឹបណាធ្វើបាននោះដែរ។
តែយ៉ាងណានៅរដូវកាលនោះ ជាមួយពានក្នុងស្រុកឯទៀតដូច FA Cup គឺ Arsenal នៅតែស្គាល់បរាជ័យ ខុសពី Preston North End ដែលកាលធ្វើបាននៅរដូវកាល ១៨៨៨-៨៩ គឺប្រកួតមិនចាញ់ទាំងក្នុងក្របខ័ណ្ឌកំពូលមាន ២២ ជុំ និង FA Cup មាន ៥ ជុំ ខ្លាំងជាង Arsenal ទៅទៀត៕
ប្រភព៖ Wikipedia