កំពូលកីឡាការិនីប៊ីយ៉ាកម្ពុជា ស្រួង ភាវី បានឈ្នះពានរង្វាន់ PBA ចំនួន៤ពានរង្វាន់ម្នាក់ឯងក្នុងនាមជាកីឡាករឆ្នើមប្រចាំឆ្នាំ២០២៣ប្រទេសកូរ៉េខាងត្បូង។
កីឡាការិនីខ្មែរខាងលើបានបង្ហោះនៅលើបណ្ដាញសង្គមរបស់ខ្លួនថា៖ “ដើមឆ្នាំ២០២៣នេះ គឺជាប្រវត្តិសាស្ត្រថ្មីមួយទៀត សម្រាប់រូបនាងខ្ញុំ ថ្ងៃនេះខ្ញុំពិតជារំភើប និងមានមោទកភាពខ្លាំងណាស់ ដោយបានទទួលពានរង្វាន់ PBA សម្រាប់កីឡាការិនីឆ្នើម ឆ្នាំ2023 ចំនួន៤ពានម្នាក់ឯង ក្នុងចំណោមកីឡាករ កីឡាការិនីឆ្នើមទាំងអស់ ដែលពួកគាត់ទទួលបានត្រឹមម្នាក់១។ ខ្ញុំរំភើបពេកស្ទើរតែរកពាក្យអ្វីនិយាយមិនចេញ តែអ្វីដែលខ្ញុំនឹកឃើញមុនគេ នេះគឺជាកិត្តិយសសម្រាប់ប្រជាជាតិរបស់ខ្ញុំ ព្រោះស្រួង ភាវី ម្នាក់នេះមកពីប្រទេសកម្ពុជា គឺជាមាតុភូមិដ៏ល្អផូរផង់របស់ខ្ញុំ។
តទៅទៀត កូនស្រីកម្ពុជាម្នាក់នេះ នឹងខិតខំប្រឹងប្រែងធ្វើអ្វីៗឱ្យអស្ចារ្យ និងនាំយកនូវកិត្តិយសដ៏បវរសម្រាប់ជាតិមាតុភូមិ ពុកម៉ែបងប្អូនយើងដែលតែងតែគាំទ្រ និងលើកទឹកចិត្តដល់រូបនាងខ្ញុំកន្លងមក។ សូមគោរពជូនពរជនរួមជាតិទាំងអស់គ្នា សូមអរគុណ!”៕