លោក Erik ten Hag ហាក់ដូចជាមានជំនឿចិត្តមែនទែន ដោយអះអាងថាក្រុមរបស់លោកនឹងមិនចាញ់ការប្រកួតណាមួយដែលនៅសល់នារដូវកាលនេះទេ។
Man Utd នឹងត្រូវប្រកួតទល់ក្រុម Real Betis នាយប់នេះ សម្រាប់ជើងទី២នៃពានរង្វាន់ Europa League វគ្គ១៦ក្រុមចុងក្រោយ។ ខណៈដែលជើងទី១កន្លងទៅ ក្រុមរបស់លោក Ten Hag បានយកឈ្នះក្នុងលទ្ធផល ៤-១ រួចទៅហើយ។ ដោយនេះអាចនិយាយបានថាជើងទី២នេះ នឹងកាន់តែងាយស្រួលសម្រាប់ក្រុមបិសាចក្រហមក្នុងការកក់កៅអីឡើងទៅវគ្គបន្ដហើយ។ មួយវិញទៀត មុនការប្រកួតចាប់ផ្ដើម លោក Ten Hag ក៏មានទំនុកចិត្តខ្ពស់ផងដែរ។
អ្នកចាត់ការសញ្ជាតិហុល្លង់បាននិយាយថា៖ “ខ្ញុំជឿថាយើងនឹងមិនបរាជ័យទៀតទេ។ នៅពេលអ្នកមើលទៅក្រុម Arsenal ដែលកំពុងធ្វើបានល្អ ពួកគេមិនមានកីឡាកររបួសនោះទេ។ យើងក៏នឹងប្រសើរខ្លាំងដូចគ្នាប្រសិនបើមិនមានបញ្ហាកីឡាកររបួស”។ សូមបញ្ជាក់ដែរថា Man Utd ជាក្រុមតែមួយគត់នារដូវកាលនេះ ដែលនៅសល់ពាន៣ក្នុងដៃទៀតដែលសុទ្ធតែអាចឈ្នះបាន ខណៈដែលក្រុមមួយនេះបានគ្រងជើងឯកពានរង្វាន់ Carabao Cup មួយរូចទៅហើយ៕