លោក Carlo Ancelotti បានអះអាងថាក្រុម Real Madrid របស់លោកនឹងបន្ដទម្រង់លេងប្រយុទ្ធរបស់ខ្លួនទៀតទល់ក្រុម Liverpool នៅជើងទី២ពានរង្វាន់ UEFA Champions League នារាត្រីនេះ។
កាលពីជើងទី១កន្លងទៅនៅទឹកដីអង់គ្លេសក្រុម Real Madrid បានយកឈ្នះលើក្រុម Liverpool រហូតដល់ ៥-២ រួចទៅហើយ។ ដូច្នេះនៅជើងទី២យប់នេះ ពួកគេមានគ្រាប់បាល់ចំណេញ៣គ្រាប់ក្នុងដៃ ហើយលេងនៅទឹកដីខ្លួនឯងទៀត នោះក្រុមអធិរាជសពិតជាមានប្រៀបជាងក្រុម Liverpool ច្រើនមែនទែន។ ក្រុមរបស់លោក Carlo Ancelotti អាចលេងការពារដើម្បីកុំឱ្យរបូតគ្រាប់បាល់ច្រើនវិញក៏បាន ក៏អាចឡើងទៅវគ្គ៨ក្រុមចុងក្រោយបានដែរ។
តែផ្ទុយទៅវិញ លោក Ancelotti បានអះអាងថា៖ “ជារឿងធម្មតា យើងនឹងព្យាយាមលេងដើម្បីឱ្យដូចកាលប្រកួតជើងទី១។ យើងនឹងមិនការពារនោះទេ យើងនឹងបន្ដការលេងប្រយុទ្ធទៅលើក្រុម Liverpool ដដែល។ យើងព្យាយាមដើម្បីឈ្នះការប្រកួត។ កីឡាកររបស់យើងដឹងច្បាស់ ទោះជាយើងមានប្រៀបជាង ប៉ុន្តែយើងនឹងបន្ដការលេងឱ្យល្អមើល”៕