ខ្សែប្រយុទ្ធ Eden Hazard បានអះអាងថាកាលពីព្រឹត្តិការណ៍ FIFA World Cup 2022 កន្លងទៅ រូបគេពិតជាមិនចង់ចូលរួមជាមួយក្រុមជម្រើសជាតិបែលហ្សិកនោះទេ។
Hazard មិនទទួលបានឱកាសលេងសោះមុនការប្រកួត World Cup 2022 កន្លងទៅនៅក្លឹប Real Madrid ដោយអង្គុយកៅអីបម្រុងជាប់ជានិច្ច។ តែនៅក្រុមជម្រើសជាតិវិញ បែរជាគ្រូបង្វឹកបែលហ្សិកសម្រេចចិត្តកោះហៅគេទៅចូលរួម ទាំងដែលទម្រង់លេងមិនល្អគ្រប់គ្រាន់នោះទេ។ ស្របពេលកីឡាករវ័យក្មេងរបស់បែលហ្សិកក៏ត្រូវបានគេមើលឃើញថាឡើងជើងច្រើននាក់ផងដែរ តែមិនទទួលបានឱកាស។
ចំពោះរឿងនេះ អតីតខ្សែប្រយុទ្ធ Chelsea បានបង្ហាញចំណាប់អារម្មណ៍ថា៖ “ខ្ញុំមិនចង់លេងនៅ World Cup 2022 ។ កីឡាករថ្មីៗបានមកគោះទ្វានៅជម្រើសជាតិជាច្រើន។ ខ្ញុំមិនបានលេងឱ្យ Real បន្ទាប់មកចូលជម្រើសជាតិនិងប្រកួត។ ខ្ញុំពិតជាមិនចង់អីចឹងទេ ព្រោះកីឡាករជំនាន់ក្រោយសក្ដិសមនឹងទទួលបានឱកាសច្រើនជាងខ្ញុំ”។
រំលឹកថាក្រោយពីចប់ FIFA World Cup 2022 ភ្លាម Hazard ក៏បានប្រកាសពីការចូលនិវត្តន៍ពីក្រុមជម្រើសជាតិភ្លាមផងដែរ។ មូលហេតុមិនខុសពីការអះអាងខាងលើនោះទេ ពោលគឺគេចង់ទុកឱកាសឱ្យក្មេងជំនាន់ក្រោយលេងឱ្យបានច្រើន៕