លោក Jose Mourinho បានបញ្ជាក់ថាលទ្ធផលប្រកួតជាមួយក្រុម Juventus នៅរាត្រីនេះ មិនមែនជាក្ដីបារម្ភសម្រាប់ក្រុម Manchester United ឡើយនៅវគ្គសន្សំពិន្ទុនេះ។
បិសាចក្រហម ត្រូវទៅលេងនៅទឹកដីអ៊ីតាលី ដោយប៉ះជាមួយក្រុម Juventus នៅរាត្រីនេះ ដើម្បីសន្សំពិន្ទុក្នុងពូល H ពានរង្វាន់ UEFA Champions League ។ Man Utd មានត្រឹមតែ៤ពិន្ទុប៉ុណ្ណោះឆ្លងកាត់៣ប្រកួតកន្លងមក ស្របពេល Juventus វិញមាន៩ពិន្ទុពេញតែម្ដង ឈរនៅកំពូលតារាង។ លទ្ធផលនេះ Man Utd នឹងត្រូវការឈ្នះដាច់ខាត ដើម្បីរក្សាតំណែងលេខ២របស់ខ្លួន។ ប៉ុន្តែចាញ់ ហើយក្រុម Velencia ឈ្នះទៀត នោះក្រុមរបស់លោក Jose នឹងធ្លាក់ទៅលេខ៣វិញហើយ។
លោក Jose និយាយចំពោះរឿងខាងលើនេះថា៖ “ប៉ះ Juventus ជាប្រកួតសំខាន់ ប៉ុន្តែវាមិនមែនជាប្រកួតកាត់សេចក្ដីឡើយ។ ការប្រកួតកាត់ក្ដីចាញ់ធ្លាក់ គឺការប្រកួតដែលនៅសល់២ទៀត ប៉ះValencia និង Young boys ឯណោះ។ ដូច្នេះ ចាញ់ឈ្នះនៅយប់នេះ វាមិនមែនជាក្ដៅកង្វល់សម្រាប់ខ្ញុំនិងក្រុមឡើយ។ វាជារឿងល្អ ដែលយើងបានមកលេងនៅទឹកដីអ៊ីតាលីនេះ”៕ប្រភពDailyMail
