ក្រៅតែកំណត់ត្រាការរកគ្រាប់បាល់ ការឈ្នះពានរង្វាន់ ទៀតសោតងាកមកសមិទ្ធផលសម្រេចបានជាបុគ្គលក៏ខ្ញីចាស់ Cristiano Ronaldo បានចារទុកជាហូរហែផងដែរក្នុងអាជីពជាកីឡាករបាល់ទាត់។
ចាំបានកាលនៅឈរជើងក្នុងក្របខ័ណ្ឌអ៊ីតាលី Serie A តារាឆ្នើមសញ្ជាតិព័រទុយហ្គាល់ ក៏មានកត់ត្រាកំណត់ត្រាធំៗជាច្រើន ក្នុងកំឡុងពេលឈរជើងជិត ៣ ឆ្នាំ មុនការចាកចេញ។ ក្នុងនោះក៏មានរយៈកម្ពស់លោតបញ្ចប់ទីខ្ពស់បំផុត CR7 ធ្លាប់ធ្វើបាន ហើយរក្សាទុកតាំងឆ្នាំ ២០១៩ មុនត្រូវបានបំបែក រុញឲ្យឈ្មោះរបស់លោកធ្លាក់មកលេខ ៣ នៅពេលបច្ចុប្បន្ន៖
៣) Cristiano Ronaldo
នៅកំឡុងខែធ្នូ ឆ្នាំ ២០១៩ ខ្សែប្រយុទ្ធខាងលើ បានបង្កើតភាពភ្ញាក់ផ្អើល តាមរយៈការលោតតែតបញ្ចប់ទីនៅរយៈកម្ពស់ខ្ពស់បំផុតដល់ទៅ ២,៥៦ ម៉ែត្រ ដោយនេះបើរាប់ពីចុងជើង ហើបផុតដី មានកម្ពស់ ០,៦៩ សង់ទីម៉ែត្រ។
វាជាពេលវេលាដែលខ្សែការពារស្លាប Alex Sandro បានក្រុសបាល់ចូលប្រអប់ ហើយ Ronaldo លោតមួយទំហឹងខ្លួន ផុតអស់ខ្សែការពារក្លឹប Sampdoria ក៏ជាគ្រាប់បាល់បើកការនាំមុខ ២-១ មុនបញ្ចប់តង់ទីមួយ។
២) Victor Osimhen
ទើបតែបញ្ចប់ការប្រកួត កាលពីថ្ងៃទី ០៥ កុម្ភៈកន្លងទៅនេះ ដែលកីឡាករសញ្ជាតិនីហ្សេរីយ៉ាអាចរកបាន ២ គ្រាប់ជាចំណែកធំ ជួយក្លឹប Napoli យកឈ្នះទៅលើ Spezia ៣-០ ក៏បន្ថែម ៣ ពិន្ទុនាំមុខដាច់ នៅចំណាត់ថ្នាក់កំពូលតារាង។
កីឡាករដែលមានកម្ពស់ ១,៨៦ ម៉ែត្រ ប្រហែលនឹង Ronaldo ដែរនោះ បានចារកំណត់ត្រាថ្មីតាមរយៈគ្រាប់បាល់ទីមួយ ដោយនៅពេលខ្សែការពារក្លឹប Spezia ផ្លោងបាល់ឡើងទៅលើផុត ក្នុងប្រអប់ ក៏ស្រាប់តែ Osimhen បានរត់សំដៅមកព្យាយាមលោតអស់ពីខ្លួន ហើបជើងផុតពីដីដល់រយៈកម្ពស់ ០,៧២ សង់ទីម៉ែត្រ មានន័យថា គ្រាប់បាល់បញ្ចប់ទីមួយនោះ មានកម្ពស់សរុប ២,៥៨ ម៉ែត្រ សម្រេចយកឈ្នះទៅលើអតីតសមាជិក Juventus។
១) Fikayo Tomori
TOMORI MAKES IT THREE!
MILAN ARE TEACHING JUVE A LESSON! 🤯 pic.twitter.com/v62qCJYm7c
— ESPN FC (@ESPNFC) May 9, 2021
កំណត់ត្រាអ្នកលោតបញ្ចប់ទីខ្ពស់បំផុតនៅ Serie A ធ្វើបានដោយកីឡាករក្លឹប AC Milan ឯណេះ ហើយជាគ្រាប់បាល់ទល់អតីតក្លឹបចាស់របស់ Ronaldo ថែមទៀត នោះគឺការយកឈ្នះ ៣-០ កាលពីចុងខែឧសភា ឆ្នាំ ២០២១។
កំឡុងពេលខ្ចីជើង ពី Chelsea មក AC Milan មិនទាន់ទិញផ្តាច់ Tomori បានចារកំណត់ត្រាថ្មីសន្លាងនៅ Serie A បាត់ទៅហើយ ដោយតាមរយៈគ្រាប់បាល់របស់កីឡាករកម្ពស់ ១,៨៥ ម៉ែត្រ រូបនេះ អាចហើបជើងផុតពីដី ដល់ ០,៧៨ សង់ទីម៉ែត្រ នាំឲ្យកម្ពស់សរុបនៃគ្រាប់បាល់នោះ ចូលដល់ ២,៦៣ ម៉ែត្រ ហើយមិនទាន់មាននរណាអាចបំបែកវាបានឡើយ មកទល់បច្ចុប្បន្ន៕
ប្រភព៖ បរទេស