Rio Ferdinand មើលឃើញថាខ្សែបម្រើ Bruno Fernandes មានទម្រង់លេងល្អណាស់ នៅពេលរូបគេលេងដោយមិនមានវត្តមានរបស់ Cristiano Ronaldo នៅក្លឹប Manchester United ។
Ronaldo បានសម្រេចចិត្តផ្ដាច់កុងត្រាជាមួយ Man Utd នៅចុងឆ្នាំ២០២២ ហើយតាំងពីពេលនោះមកឃើញថាក្រុម Man Utd បែរជាធ្វើបានល្អ និងឈ្នះការប្រកួតជាប់ទៅវិញ។ ជាក់ស្ដែងសមាជិកក្រុមក៏ធ្វើបានល្អ និងសហការគ្នាលេងផងដែរ។ ជាពិសេសខ្សែបម្រើកណ្ដាល Bruno ផ្ទាល់តែម្ដង ដែលគេចាប់ផ្ដើមលេងបានល្អឡើងវិញ ក្លាយជាតួអង្គសំខាន់ក្នុងក្រុម។
លោក Rio អតីតកីឡាករបិសាចក្រហម Man Utd បាននិយាយថា៖ “មានកីឡាករខ្លះដែលមិនទាក់ទងគ្នាល្អនោះទេនៅលើទីលាន ហើយខ្ញុំគិតថាករណីនេះជាមួយ Ronaldo និង Fernandes ។ Fernandes ចាប់ផ្ដើមលេងល្អនៅពេល Ronaldo មិនចូលលេងឬមិនស្ថិតក្នុងក្រុម។ Fernandes ចង់ក្លាយជាកីឡាករសំខាន់ អ្នកគ្រប់គ្រងការប្រកួត។ គាត់ចង់ឱ្យកីឡាករក្នុងក្រុមងាកមករកគាត់ ដើម្បីឱ្យគាត់ចែកបាល់ឱ្យទៅវិញ”៕