វិស័យសារព័ត៌មានត្រូវបានចាត់ទុកថាជាកញ្ចក់ឆ្លុះបញ្ចាំងពីតថភាពនូវអ្វីជាសច្ចៈភាពរបស់កម្ពុជា នាពេលបច្ចុប្បន្នទៅកាន់ពិភពលោក តាមរយៈព្រឹត្តិការណ៍កីឡាដ៏អស្ចារ្យក្នុងនាមជាម្ចាស់ផ្ទះការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ជាប្រវត្តិសាស្ត្រដំបូងរបស់កម្ពុជា ក្រោយរង់ចាំ៦៤ឆ្នាំ។
នេះជាការលើកឡើងរបស់ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ (CAMSOC/CAMAPGOC) នៅក្រោយកិច្ចប្រជុំជាមួយឯកឧត្តម ផុស សុវណ្ណ ប្រតិភូរាជរដ្ឋាភិបាល អគ្គនាយកសោតទស្សន៍នៃក្រសួងព័ត៌មាន និងជាប្រធានគណៈកម្មការព័ត៌មាន និងផ្សព្វផ្សាយ និងគណៈកម្មការហ្គេមព័ត៌មានវិទ្យា នៃ CAMSOC នៅល្ងាចថ្ងៃទី០៦ ខែកុម្ភៈ ឆ្នាំ២០២៣ នៅមជ្ឈមណ្ឌលប្រតិបត្តិការកីឡានៃពហុកីឡដ្ឋានជាតិមរតកតេជោ។
ឯកឧត្តម វ៉ាត់ ចំរើន មានប្រសាសន៍ថានេះជាកិច្ចការចុងក្រោយដែលយើងនៅសល់ ៨៨ថ្ងៃទៀត ដល់ថ្ងៃពិធីបើកស៊ីហ្គេម លើកទី៣២ ឆ្នាំ២០២៣។ ចាប់ពីខែមីនា ឆ្នាំ២០២៣ តទៅនឹងចាប់ផ្តើមរៀបចំទីតាំង ការទទួលចុះឈ្មោះអ្នកសារព័ត៌មាន និងការធ្វើប័ណ្ណសម្រាប់សារព័ត៌មានជាតិ និងអន្តរជាតិ។ ជាមួយគ្នានេះ ក្នុងនាមជាម្ចាស់ផ្ទះ កម្ពុជានឹងទទួលបដិសណ្ឋារកិច្ចជូនដល់អ្នកសារព័ត៌មានអន្តរជាតិរាប់រយនាក់ជាមួយនឹងការផ្តល់នូវមធ្យោបាយផ្សេងៗទៀតជូនដល់ពួកគាត់ប្រកបដោយភាពកក់ក្តៅ។