អ្នកចាំទី Nick Pope របស់ក្រុម Newcastle United កំពុងកាន់កំណត់ត្រាល្អរក្សាសំណាញ់ទី clean sheet ចំនួន១០ប្រកួតជាប់គ្នាមកហើយ។
Newcastle United បានយកឈ្នះលើក្រុម Southamton ១-០ ក្នុងការប្រកួតជើងទី១វគ្គពាក់កណ្ដាលផ្ដាច់ព្រ័ត្រនៃពានរង្វាន់ Carabao Cup ។ ខណៈដែលការធ្វើបាន clean sheet ប្រកួតនេះ គឺជាប្រកួតទី៦ជាប់គ្នាហើយសម្រាប់ Newcastle United តែបើចំពោះអ្នកចាំទី Pope វិញ ឱ្យតែគេបានឱកាសចាប់ គឺអាចរក្សា clean sheet បានដល់ទៅ១០ប្រកួតទៅហើយ។ នេះជាកំណត់ត្រាមែនទែនសម្រាប់ Pope ក្នុងនាមជាអ្នកចាំទី។
កីឡាករជម្រើសជាតិអង់គ្លេសរូបនេះក៏មានឱកាសបានលេងឱ្យតោកំណាចអង់គ្លេសផងដែរ។ នៅពេល Jordan Pickford របួស គេគឺជាអ្នកចាំទីដៃទី២ និងបានលេងទល់ក្រុមអ៊ីតាលី និងអាល្លឺម៉ង់ថែមទៀតក្នុងពានរង្វាន់ UEFA Nations League កន្លងទៅ។ ក្នុងប្រវត្តិសាស្ត្រកន្លងមក មានតែ Edwin van der Sar មួយទេដែលធ្វើបាន Clean sheet ច្រើនជាង Pope ពោលគឺ Van der Sar ធ្វើបានដល់១២ដង៕