លោក Didier Deschamps គ្រូបង្វឹកក្រុមជម្រើសជាតិបារាំង បានអះអាងថាក្រុមរបស់ខ្លួនមិនអាចមើលស្រាលទៅលើក្រុមប៉ូឡូញបាននោះទេក្នុងការប្រកួត World Cup 2022 នៅរាត្រីនេះ។
បារាំងជាក្រុមការពារតំណែងជើងឯក ហើយមួយវិញទៀតនាឆ្នាំនេះពួកគេក៏ជាបេក្ខភាពលេចធ្លោផងដែរក្នុងការប្រជែងពានរង្វាន់ជាមួយក្រុមដទៃទៀត។ ឈរលេខ១ក្នុងពូល និងឈ្នះ២ប្រកួតជាប់គ្នានៅបើកឆាក បានធ្វើឱ្យបារាំងទុកជើងច្រើនសម្រាប់ប្រកួតទី៣ក្នុងពូល ព្រោះពួកគេបានឡើងដោយស្វ័យប្រវត្តិទៅហើយ។ ដូច្នេះនៅរាត្រីនេះ ជឿថាបារាំងនឹងដាក់កីឡាករពេញជើងវិញដើម្បីប្រជែងជាមួយក្រុមប៉ូឡូញជាក់ជាមិនខាន។
លោក Didier Deschamps គ្រូបង្វឹករបស់ក្រុមជម្រើសជាតិបារាំងបាននិយាយមុនការប្រកួតថា៖ “យើងត្រូវតែគោរពដល់ក្រុមប៉ូឡូញ។ ពួកគេជាក្រុមដែលលេងការពារទាំង៣ប្រកួតកន្លងមក ពួកគេលេងការពារច្រើន និងការពារបានល្អណាស់។ ពួកគេមានកីឡាករល្អៗ និងសំបូរបទពិសោធ អ្នកត្រូវតែផ្ដល់ការគោរពដល់ពួកគេ ហើយពួកគេសក្ដិសមមកដល់ទីនេះ”៕