លោក Luis van Gaal គ្រូបង្វឹកក្រុមជម្រើសជាតិហុល្លង់បានអះអាងថាក្រុមរបស់លោកអាចមានឱកាសឈ្នះពានរង្វាន់ FIFA World Cup 2022 នេះបាន។
ហុល្លង់បានកក់កៅអីឡើងទៅវគ្គ៨ក្រុមចុងក្រោយហើយ បន្ទាប់ពីក្រុមមួយនេះបានយកឈ្នះលើក្រុមអាមេរិកបានក្នុងលទ្ធផល ៣-១។ ជាមួយការធ្វើបានល្អ និងកំពុងកាន់កំណត់ត្រាមិនចាញ់នេះដែរ ក្រុមហុល្លង់ឡើងទៅវគ្គបន្ដនឹងប៉ះជាមួយក្រុមអាហ្សង់ទីនដែលជាជើងខ្លាំងនៅអាមេរិកឡាទីនថែមទៀត។ តែបើទោះជាប៉ះគីឡូធ្ងន់យ៉ាងនេះក្ដី លោក Van Gaal នៅតែជឿជាក់លើកូនក្រុម និងអះអាងថាអាចឡើងទៅវគ្គបន្ដបាន។
អតីតគ្រូបង្វឹក Manchester United បាននិយាយថា៖ “យើងអាចជាជើងឯកបាន ខ្ញុំមិននិយាយថាយើងនឹងនោះទេ ប៉ុន្តែយើងអាចធ្វើបាន។ ខ្ញុំបាននិយាយរឿងនេះជាង១ឆ្នាំមកហើយ។ ខ្ញុំនិយាយបែបនេះ ខ្ញុំរងការរិះគន់ច្រើនទៅលើការលេងរបស់យើង បើទោះជាយើងធ្វើបានល្អហើយក្ដី។ យើងនឹងសិក្សាបន្ដទៀតទៅលើការគ្រប់គ្រងបាល់ ប៉ុន្តែក្រុមរបស់យើងពិតជាធ្វើបានល្អហើយ”។
Van Gaal វ័យ៧១ឆ្នាំជាគ្រូបង្វឹកដែលចាស់ជាងគេក្នុងព្រឹត្តិការណ៍ FIFA World Cup 2022 នេះ តែលោកក៏កំពុងដឹកនាំក្រុមហុល្លង់លេង១៩ប្រកួតដោយមិនទាន់ស្គាល់ពាក្យថាចាញ់ផងដែរ។ ការឡើងទៅវគ្គ៨ក្រុមចុងក្រោយ ក្រុមហុល្លង់នឹងប៉ះជាមួយក្រុមអាហ្សង់ទីនដែលជាជើងខ្លាំងមួយផងដែរ៕