គិតត្រឹមរសៀលថ្ងៃចន្ទនេះ យើងបានរកឃើញក្រុមចំនួន ១ ដែលត្រូវឡើងទៅកាន់វគ្គបន្ទាប់ ១៦ ក្រុមចុងក្រោយគឺមាន់គកបារាំង និង ២ ក្រុមដែលត្រូវហាលអាវ គឺម្ចាស់ផ្ទះកាតារ និងកាណាដា។ យ៉ាងណាយើងចាប់អារម្មណ៍ទៅលទ្ធផលក្នុងពូល D ក្រៅតែពីមើលឃើញជម្រើសជាតិដឹកនាំដោយលោក Didier Deschamps ធ្វើបាន ៦ ពិន្ទុដាច់ ទៀតសោតក៏រាប់ជាការដោះបណ្តាសារលើម្ចាស់ជើងឯករដូវកាលចាស់ ធ្លាប់កើតមាន ៣ សម័យកាលជាប់ តាំងពីលើក្រុមឈ្នះជើងឯកឆ្នាំ ២០០៦។
នោះគឺមានន័យថា ឲ្យតែក្រុមណាជាម្ចាស់ជើងឯកសម័យកាលចាស់ លុះមកដល់ World Cup សម័យកាលបន្ទាប់ ពួកគេមិនដែលធ្វើបានល្អឡើយ ពោលធ្លាក់ត្រឹមវគ្គចែកពូល ឬ ៣២ ក្រុម បន្តបន្ទាប់ជាប់គ្នា អស់រយៈពេល ១២ ឆ្នាំហើយ រហូតទើបតែមកដល់ឆ្នាំ ២០២២ បែរជាបារាំងអាចដោះបណ្តាសារនេះបាន៖
១) អ៊ីតាលីហាលអាវនៅឆ្នាំ ២០១០
ឈ្មោះជាម្ចាស់ជើងឯក World Cup ឆ្នាំ ២០០៦ មកដល់សម័យកាលថ្មី ក៏ជឿថាក្រុមឯទៀត ប្រាកដជាមានការខ្លាចរអាមិនខាន តែមានឯណាលទ្ធផលបែរផ្ទុយស្រឡះ ដោយអ៊ីតាលីបញ្ចប់លទ្ធផលនៅវគ្គចែកពូល ឈរក្រោមគេបង្អស់គឺលេខ ៤។
ស្ថិតក្នុងពូល F ប៉ារ៉ាហ្គាយ ឈរលេខ ១ ទទួលបាន ៥ ពិន្ទុចាប់ដៃស្លូវ៉ាគីជាក្រុមលេខ ២ បាន ៤ ពិន្ទុឡើងទៅកាន់វគ្គ ១៦ ក្រុម ស្របពេលនូវែលហ្សេឡង់ និងអ៊ីតាលីហាលអាវត្រឹមវគ្គនេះ។
២) អេស្ប៉ាញហាលអាវនៅឆ្នាំ ២០១៤
ដូចប្រិយមិត្តជាច្រើនបានដឹង អេស្ប៉ាញគឺជាម្ចាស់ជើងឯក World Cup ឆ្នាំ ២០១០ ក្រោយបំបាក់ហូឡង់ ១-០ នៅវគ្គផ្ដាច់ព្រ័ត្រ។ តែចូលដល់សម័យកាលបន្ទាប់ ២០១៤ ពួកគេបែរជាមិនអាចឆ្លងផុតវគ្គចែកពូល ដូចបណ្តាសារការធ្លាក់របស់អ៊ីតាលីដែរ។
ស្ថិតក្នុងពូល B ពេលនោះក្រុមគោជល់អេស្ប៉ាញ យកបានត្រឹម ៣ ពិន្ទុ ធ្លាក់ទៅជាមួយអូស្រ្តាលី ហើយហូឡង់បាន ៩ ពិន្ទុពេញ ដឹកដៃឈីលីបាន ៦ ពិន្ទុឡើងទៅកាន់វគ្គបន្ទាប់។
៣) អាល្លឺម៉ង់ហាលអាវនៅឆ្នាំ ២០១៨
នៅឆ្នាំ ២០១៤ ដែលប្រេស៊ីលធ្វើជាម្ចាស់ផ្ទះ FIFA World Cup ក្រុមឈ្នះជើងឯក បានទៅលើឥន្ទ្រីយ៍ដែកអាល្លឺម៉ង់ តែរំលង ៤ ឆ្នាំបន្ទាប់ ២០១៨ ពួកគេបែរធ្លាក់ត្រឹមវគ្គចែកពូលដូចបណ្តាសារអ៊ីតាលី/អេស្ប៉ាញ ២ សម័យកាលមុនដែរ។
អាល្លឺម៉ង់ឈរលេខ ៤ ស្មើពិន្ទុនឹងកូរ៉េខាងត្បូង ហើយបានអនុញ្ញាតឲ្យស៊ុយអែត និងម៊ិកស៊ីកូ តំណាងពីរក្រុមល្អបំផុតក្នុងពូល F ឡើងទៅវគ្គ ១៦ ក្រុម។ ក្នុងសម័យកាល ២០១៨ គឺមាន់គកបារាំងជាម្ចាស់ជើងឯក តែរំលង ៤ ឆ្នាំបន្ទាប់ ២០២២ នេះ ពួកគេបែរធ្វើបានល្អ ក៏ជាក្រុមដំបូងបានឡើងទៅវគ្គបន្ទាប់ទៅវិញ ម្ល៉េះមានន័យថាបណ្តាសារ ៣ សម័យកាលជាប់ គឺបានសាបហើយនៅកាតារសារនេះ៕
ប្រភព៖ បរទេស