ខ្សែប្រយុទ្ធម្នាក់ទៀតត្រូវបានបញ្ចូលទៅក្នុងបញ្ជីនៃគោលដៅរបស់ Manchester United សម្រាប់ទីផ្សារដោះដូរកីឡាករខែមករា បន្ទាប់ពីការចាកចេញ របស់ Cristiano Ronaldo។
កាលពីដើមសប្តាហ៍នេះ ត្រូវបានប្រកាសដោយ Man United ថាក្លឹប និង Ronaldo បានយល់ព្រមព្រៀងគ្នាក្នុងការបញ្ចប់កិច្ចសន្យារបស់ខ្សែប្រយុទ្ធណ ព័រទុយហ្គាល់ បន្ទាប់ពីបទសម្ភាសន៍ដ៏ផ្ទុះកក្រើករបស់គាត់ជាមួយ Piers Morgan។
Ronaldo ឥឡូវនេះជាកីឡាករគ្មានតម្លៃខ្លួន ហើយគាត់កំពុងដាក់ការផ្តោតយកចិត្តទុកដាក់ទាំងអស់របស់គាត់ទៅលើការប្រកួត World Cup ជាមួយក្រុម ព័រទុយហ្គាល់ ដែលធ្វើឲ្យ Man United ហាក់កំពុងខ្វះខាតខ្សែប្រយុទ្ធម្នាក់មកជំនួសកន្លែងរបស់គាត់។ 
យោងតាមរបាយការណ៍ចុងក្រោយបំផុតរបស់ Florian Plettenberg នៃ Sky Sports បានឲ្យដឹងថា៖
“បេក្ខជនម្នាក់ទៀតរបស់ Manchester United គឺខ្សែប្រយុទ្ធកាណាដាអាយុ ២២ឆ្នាំ។ គាត់ត្រូវបានគេតាមសង្កេតមើលជាច្រើនដង ហើយគាត់ចង់បោះជំហានបន្ទាប់មួយទៀត។ យើងត្រូវបានគេប្រាប់ថា Lille នឹងដោះលែងគាត់ក្នុងរដូវរងានេះសម្រាប់តម្លៃផ្ទេរប្រហែល ៥០លានអឺរ៉ូ” ៕
ប្រភព៖ Sky Sports