នៅវគ្គចែកពូល FIFA World Cup 2022 ដែលកំពុងតែដំណើរការយ៉ាងជក់ចិត្ត ហាក់បានដិតជាប់នូវការចងចាំដ៏ល្អសម្រាប់ប្រទេសតូចៗមួយចំនួន បន្ទាប់អាចយកឈ្នះជម្រើសជាតិគីឡូធ្ងន់ ជាក់ស្តែងដូចអារ៉ាប៊ីសាអ៊ូឌីត បំបាក់អាហ្សង់ទីន ហើយជប៉ុនកាច់ស្លាបឥន្ទ្រីយ៍ដែកអាល្លឺម៉ង់កាលពីយប់មិញ។
សាច់បាល់របស់ជប៉ុនលេងទល់អាល្លឺម៉ង់ ប្រហែលនឹងលទ្ធផលកើតមានរវាងក្រុមមកពីអាមេរិកឡាទីននិងមជ្ឈិមបូព៌ាមុននោះដែរ ដោយតង់ទី ១ ខាងក្រុមមាន FIFA Ranking ខ្ពស់ជាង បានបើកការនាំមុខ ដល់ចូលតង់ទី ២ លទ្ធផលបែរផ្ទុយស្រឡះ។
CTS Sports បង្ហាញឲ្យប្រិយមិត្តបានស្គាល់អំពីកីឡាកររកគ្រាប់បាល់យកឈ្នះឲ្យសាំមូរ៉ៃខៀវ និងទម្លាប់ប្រជាជនជប៉ុន ដល់ទទួលបានការសាទរពីមនុស្សជាតិទូទាំងសកលលោក៖
១) រៀនចូលសម្បុកឥន្ទ្រីយ៍ ដើម្បីកាច់ស្លាបឥន្ទ្រីយ៍
មិនមែនជារឿងចៃដន្យនោះទេ តែវាគឺជាយុទ្ធសាស្ត្រសុទ្ធសាធ ដែលអ្នកចាត់ការមិនបានរំលងការប្រើប្រាស់ Takuma Aasano និង Ritsu Doan។ តើអ្នកដឹងទេ កីឡាករលេងតំបន់ប្រយុទ្ធទាំងពីរ សុទ្ធសឹងជាកីឡាករអាជីពកំពុងឈរជើងឲ្យក្លឹបនៅឯលីគកំពូលអាល្លឺម៉ង់។
ខ្សែប្រយុទ្ធ Doan ជាអ្នករកបានគ្រាប់បាល់ទីមួយឲ្យជប៉ុនតាមស្មើអាល្លឺម៉ង់ គេគឺជាស្លាបប្រយុទ្ធដ៏សកម្ម ឈរជើងឲ្យក្លឹប SC Freiburg ជាក្លឹបឈរលេខរៀងទី ២ នៅក្របខ័ណ្ឌកំពូល Bundesliga។ កីឡាករវ័យ ២៤ ឆ្នាំ ស្ថិតិឲ្យក្លឹប Freiburg បង្ហាញខ្លួន ២២ ប្រកួត ក៏រកបាន ៤ គ្រាប់និង Assist ៤ លើកផងដែរ។
ចំណែកឯ Asano ក៏រាប់ថាគេជាកីឡាករយល់ពីតាក់តិច និងការលេងរបស់កីឡាករអាល្លឺម៉ង់ច្បាស់ដូចគ្នា ដ្បិតអីសព្វថ្ងៃជាសមាជិកក្លឹប VfL Bochum ជាក្លឹបឈរនៅបាតតារាង Bundesliga។ នៅក្របខ័ណ្ឌកំពូលអាល្លឺម៉ង់រដូវកាលនេះ Asano ក៏បានរំលេចវត្តមានជាង ៤០០ នាទី ហើយមុននេះ គេក៏ធ្លាប់ហែលកាត់បទពិសោធន៍ជាមួយក្លឹប Hannover 96 និង Stuttgart ពីរផ្សេងទៀត។
២) ទម្លាប់ដ៏ល្អរបស់ប្រជាជនជប៉ុន
មិនថាចាញ់ឬឈ្នះ ទម្លាប់របស់ជនជាតិជប៉ុនសឹងតែទាំងអស់ ឲ្យតែទៅដល់ទីណា គឺទីនោះត្រូវតែស្អាត ទោះសំរាមក្នុងកីឡដ្ឋានមិនមែនជាកាកសំណល់បោះចោលខ្លួនឯងក៏ដោយ ក្រោយចប់ការប្រកួតពួកគាត់តែងដើរប្រមូល យ៉ាងហោចក៏បានម្នាក់មួយថង់ពីរ ទើបដើរសំដៅចាកចេញទៅ។
អ្នកគាំទ្រទូទាំងសកលលោក ដែលកំពុងចាប់អារម្មណ៍ជាមួយព្រឹត្តិការណ៍បាល់ទាត់កើតមាន ៤ ឆ្នាំម្តង FIFA World Cup បានបង្ហាញការស្ងើចសរសើរ និងសាទរជាពន់ពេក ដល់ទម្លាប់របស់ជនជាតិជប៉ុន។ តាមថាទៅមិនត្រឹមតែក្នុងកីឡដ្ឋាននោះទេ ទៀតសោតសូម្បីក្នុងបន្ទប់ផ្លាស់សំលៀកបំពាក់ ក៏កីឡាករបានរៀបចំយ៉ាងមានរបៀបរៀបរយ ហើយកាយវិការទាំងអស់នេះសោត ក៏មានការចែករំលែករាប់សិបមុឺនដង ដើម្បីឲ្យជាការចងចាំ និងជាគំរូដ៏ល្អសម្រាប់កីឡាករ ក៏ដូចជាក្មេងៗជំនាន់ក្រោយនៃជម្រើសជាតិដទៃ៕
ប្រភព៖ បរទេស