ឯកឧត្តបណ្ឌិត ថោង ខុន បានអះអាងថាការរៀបចំកីឡាជាតិលើកទី៣ ជាការផ្តល់អត្ថប្រយោជន៍ និងបទពិសោធល្អៗ ឆ្ពោះទៅស៊ីហ្គេម-អាស៊ានប៉ារ៉ាហ្គេម ២០២៣។
ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) មានប្រសាសន៍ថា៖ ក្រោយពីទទួលបានការអនុញ្ញាតពីរាជរដ្ឋាភិបាលកម្ពុជា ដោយសហការជាមួយក្រសួងអប់រំ យុវជន និងកីឡា និងសហព័ន្ធកីឡាជាតិ បានរៀបចំការប្រកួតព្រឹត្តិការណ៍កីឡាជាតិ លើកទី៣ និងកីឡាជាតិប៉ារ៉ាហ្គេម លើកទី១ ឆ្នាំ២០២២នេះ គឺសសរស្តម្ភទាំង៣ បានសហការគ្នាយ៉ាងជិតស្និទ្ធ និងឯកភាពរៀបចំតាមនិយាមស្តង់ដាស៊ីហ្គេម និងអាស៊ានប៉ារ៉ាហ្គេម ដើម្បីផ្តល់អត្ថប្រយោជន៍ដល់មន្ត្រីបច្ចេកទេស អ្នកស្ម័គ្រចិត្ត កីឡាករ កីឡាការិនី ពិសេសសហព័ន្ធកីឡាជាតិ បានរៀនសូត្រពីការអនុវត្តផ្ទាល់ និងបទពិសោធល្អៗ ក្នុងការដឹកនាំគ្រប់គ្រង ត្រៀមឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ២០២៣។ នេះជាប្រសាសន៍របស់ឯកឧត្ដមបណ្ឌិតថ្លែងរាយការណ៍ ក្នុងឱកាសបើកការប្រកួតកីឡាជាតិ លើកទី៣ និងកីឡាជាតិប៉ារ៉ាហ្គេម លើកទី១ នៅល្ងាចថ្ងៃទី២១ ខែវិច្ឆិកា ឆ្នាំ២០២២ នៅពហុកីឡដ្ឋានជាតិមរតកតេជោ ក្រោមវត្តមានដ៏ខ្ពង់ខ្ពស់សម្តេចតេជោ ហ៊ុន សែន។
ព្រឹត្តិការណ៍កីឡាជាតិនេះ ត្រូវបានយកចិត្តទុកដាក់ខ្ពស់ ក្នុងការគ្រប់គ្រងពហុកីឡា ការយល់ដឹងពីរូបមន្តស្តង់ដាគ្រប់គ្រងរួមមួយ ដែលផ្តល់ការយកចិត្តទុកដាក់របស់សសរស្តម្ភទាំង៣ គឺជាការចាំបាច់ ក្នុងនោះរួមមាន៖ ១.ការរៀបចំបច្ចេកទេសកីឡា ដែលជាតួនាទីរបស់សហព័ន្ធកីឡាជាតិ ២.ការរៀបចំបដិសណ្ឋារកិច្ច ប្រតិភូកីឡា ជាមួយនឹងការដឹកជញ្ជូន ហូបចុកស្នាក់នៅ សន្តិសុខសណ្តាប់ធ្នាប់ សុខាភិបាល និងពិធីការកីឡា ៣.ពិធីបើក-បិទ និងពិធីកីឡាផ្សេងៗទៀត។
សសរស្តម្ភធំៗទាំងបីខាងលើនេះ បានរៀបចំប្រកបដោយស្តង់ដាជំនាញវិជ្ជាជីវៈកីឡាជាមួយនឹងកិច្ចសហប្រតិបត្តិការយ៉ាងល្អពីគ្រប់ភាគីពាក់ព័ន្ធ ដោយប្រទាក់ក្រឡាគ្នាបានល្អនោះ នឹងជំរុញឲ្យទិវាកីឡា ក្លាយជាបុណ្យកីឡាដ៏អធិកអធមប្រកបដោយកិត្តិយស កិត្យានុភាព និងមោទកភាព ក្នុងនាមជាម្ចាស់ផ្ទះ៕