ក្លឹប Real Madrid បានបញ្ជាក់នៅថ្ងៃនេះថា ខ្សែការពារស្លាប Marcelo អាចចូលលេងបានក្នុងការប្រកួត El Clasico នៅថ្ងៃអាទិត្យចុងសប្ដាហ៍នេះ។
Marcelo បានរងរបួសអំឡុងពេលលេងកាលពីប្រកួតមុននេះ។ យ៉ាងណាមិញ រូបគេមិនមានអ្វីធ្ងន់ធ្ងរឡើយ ហើយអាចចូលលេងបាននៅពេលប៉ះ Barcelona ចុងសប្ដាហ៍នេះ។ ក្លឹប Real Madrid បានប្រកាសដូច្នេះ ក្រោយពីមានដំណឹងជាច្រើនចុះផ្សាយពាក្យមិនពិត ចំពោះរបួសរបស់ខ្សែការពារសំខាន់ម្នាក់នេះ។ ក្រុមគ្រូពេទ្យបានបញ្ជាក់ថា វាគ្រាន់តែមានការឈឺចាប់សាច់ដុំបន្តិចបន្ដួចប៉ុណ្ណោះ ហើយសម្រាកត្រឹម១ថ្ងៃ នោះអ្វីគ្រប់យ៉ាងនឹងល្អដូចដើមវិញ។
Real Madrid ហាក់ធូរចិត្តបន្តិចនៅពេលបានដឹងថា Marcelo អាចលេងបាន ប៉ុន្តែកីឡាករ២នាក់ទៀតនៅមិនទាន់ច្បាស់នៅឡើយទេ។ Mariano ខ្សែប្រយុទ្ធទើបទិញចូលមកវិញ អវត្តមានហ្វឹកហាត់ជាមួយក្រុម ដោយសាររបួស ស្របពេល Dani Carvajal អាចរត់បានតិចៗវិញហើយ ប៉ុន្តែក៏មិនទាន់បានហាត់ជុំក្រុមដែរ។ លោក Lopetegui គ្រូបង្វឹក Real Madrid បានកោះហៅកីឡាករក្មេងៗជាច្រើន ដើម្បីធ្វើដំណើរទៅលេងជាមួយ Barcelona ៕ប្រភព៖ MARCA
