ក្រុមបាល់ទាត់ជម្រើសជាតិរុស្ស៊ីត្រូវបានដកចេញមិនឱ្យចូលរួមប្រកួតក្នុងពានរង្វាន់ Euro 2024 នោះទេ ក្រោយពីប្រទេសនេះបានធ្វើសង្គ្រាមរុកលុយប្រទេសអ៊ុយក្រែន។
រុស្ស៊ី តាំងពីចូលវាយលើអ៊ុយក្រែនមក ឃើញថាស្ទើរគ្រប់វិស័យកីឡារបស់ខ្លួនត្រូវបានផ្អាកការប្រកួតអន្ដរជាតិទាំងអស់។ ជាក់ស្ដែងការប្រកួត World Cup 2022 នេះ ពួកគេក៏ត្រូវបាន FIFA ដកឈ្មោះចេញមិនឱ្យលេងផងដែរ។ ស្របពេលនេះ ក៏មានដំណឹងថាខាង UEFA ឯណោះវិញ ក៏បានដករុស្ស៊ីចេញពីការប្រកួតជម្រុះពានរង្វាន់ Euro 2024 ថែមទៀត។ តែសម្ព័ន្ធមិត្តរុស្ស៊ីវិញ គឺប្រទេសបេឡារ៉ូសមិនត្រូវបានដកចេញនោះទេ ពោលគឺពួកគេអាចលេងបានធម្មតា។
សូមបញ្ជាក់ដែរថា UEFA បានផ្អាកការប្រកួតរបស់ក្រុមជម្រើសជាតិរុស្ស៊ីទាំងអស់នៅអឺរ៉ុប ហើយសូម្បីតែក្លឹបវិញក៏មិនអាចចូលលេងពានដូចជា UEFA Champions League , Europa League ឬ Europa Conference League បានផងដែរនារដូវកាលនេះ៕