ខ្សែប្រយុទ្ធ Luis Suarez កំពុងស្ថិតនៅ Free Transfer មិនទាន់មានក្លឹបលេងនោះទេ បន្ទាប់ពីគេនឹងចាកចេញពីក្រុម Nacional នៅពេលចប់លីគអ៊ុយរុយហ្គាយទៅ។
មិនទាន់មានការប្រកាសផ្លូវការឬបង្ហោះរូបពីសំណាក់កីឡាករនិងក្លឹបនៅឡើយទេ ប៉ុន្តែប្រធានក្លឹបឯណោះទៅវិញដែលបានបង្ហើបរឿង Suarez ចាកចេញនេះ។ លោក Jose Fuentes ប្រធានក្លឹប Nacional បាននិយាយថា៖ “ពេលលីគអ៊ុយរុយហ្គាយចប់ Suarez នឹងចាកចេញ នេះជាអ្វីដែលយើងបានព្រមព្រៀងគ្នានៅពេលគាត់ចូលរួមជាមួយយើង។ ខ្ញុំនិយាយនេះកុំឱ្យមានអ្នកគាំទ្ររំពឹងច្រើនពីគាត់នារដូវកាលបន្ទាប់ ព្រោះ Suarez នឹងចាកចេញហើយ។ យើងបានសួរគាត់ម្ដងទៀតដែរ ប៉ុន្តែចម្លើយនៅតែដដែល គាត់នឹងចាកចេញ”។
រំលឹកថាខ្សែប្រយុទ្ធវ័យ៣៥ឆ្នាំបានចាកចេញពីក្រុម Atletico Madrid ហើយចូលរួមជាមួយក្រុម Nacional កាលពីរដូវក្ដៅកន្លងទៅ។ ការទៅលេងនៅលីគនៅឯស្រុកកំណើតនេះ រូបគេរកបាន៤គ្រាប់ដែរក្នុងការបង្ហាញខ្លួន៨ប្រកួតមកនេះ។ តែនៅពេលលីគប្រទេសអ៊ុយរុយហ្គាយបញ្ចប់ នោះគេនឹងចាកចេញហើយ ព្រោះតាមបំណង Suarez ចង់បន្ដអាជីពនៅអឺរ៉ុបច្រើនជាង។ អតីតខ្សែប្រយុទ្ធ Barcelona រូបនេះ ចង់លេងនៅអឺរ៉ុប ដើម្បីពង្រឹងសមត្ថភាពត្រៀមលេង FIFA World Cup 2022 ខាងមុខ៕