ក្រុមហង្សក្រហម Liverpool នឹងដេញថ្លៃយកខ្សែបម្រើ Valverde ពីក្រុម Real Madrid ម្ដងទៀតនាពេលខាងមុខនេះ ក្រោយពីឃើញទម្រង់លេងរបស់គេកាន់តែល្អឡើង។
កាលពីទីផ្សារដោះដូរកីឡាករកន្លងទៅ ក្រុមរបស់លោក Jurgen Klopp បានដាក់ដេញថ្លៃយកខ្សែបម្រើវ័យក្មេងសញ្ជាតិអ៊ុយរុយហ្គាយខាងលើម្ដងមកហើយ ក្នុងតម្លៃ១០០លានអឺរ៉ូ ប៉ុន្តែក៏ត្រូវបានក្រុមអធិរាជសច្រានចោលវិញ។ យ៉ាងណាមិញ នារដូវកាលនេះ Valverde កាន់តែបង្ហាញទម្រង់លេងល្អឡើងបន្ថែមទៀត ដោយរកបានគ្រាប់បាល់៣ប្រកួតជាប់គ្នាមកហើយ ធ្វើឱ្យក្រុម Liverpool កាន់តែចង់បានគេឡើងទ្វេរដង។ រហូតដល់មានដំណឹងថានឹងដាក់ដេញថ្លៃជាលើកទី២ក្នុងពេលខាងមុខ ដោយបន្ថែមតម្លៃខ្លួនកើនខ្លាំងផងដែរ។
Valverde នារដូវកាលនេះទទួលបានទំនុកចិត្តពីលោក Carlo Ancelotti ណាស់ ដោយបានលេងជម្រើសដំបូង និងរកគ្រាប់បាល់ជួយក្រុមបានទៀត។ ជាក់ស្ដែង គ្រាប់បាល់របស់កីឡាករវ័យក្មេងរូបនេះ សុទ្ធសឹងតែជាគ្រាប់បាល់ញ៉ាក់ខ្សែការពារបញ្ចូលទីយ៉ាងស្អាតផងដែរ។ លោក Ancelotti ធ្លាប់បាននិយាយហើយថានារដូវកាលនេះ ប្រសិនបើ Valverde មិនអាចរកបានដល់១០គ្រាប់ទេ លោកសុខចិត្តហែកសញ្ញាបត្រគ្រូបង្វឹករបស់ខ្លួនចោលថែមទៀត៕