ក្រុមអត្តពលិកកម្ពុជា ប្រមាណ១៦១នាក់បានចាកចេញពីប្រទេសកម្ពុជាធ្វើដំណើរទៅប្រទេសចិននៅព្រឹកនេះហើយ ដើម្បីបោះជំរំហ្វឹកហាត់រយៈពេលវែង ត្រៀមខ្លួនចូលប្រកួតស៊ីហ្គេម២០២៣ខាងមុខ។
ក្នុងឱកាសចេញដំណើរទៅចិននេះដែរ ឯកឧត្តម វ៉ាត់ ចំរើន បានផ្ដាំផ្ញើប្រតិភូ គ្រូ និងកីឡាករ កីឡាការិនីថា៖ “ការហ្វឹកហាត់ជារឿងធម្មតារបស់យើង តែត្រូវធ្វើរឿងធម្មតានេះ ឲ្យក្លាយ ទៅជារឿងអស្ចារ្យ សម្រាប់ជោគជ័យនៃជីវិតរបស់យើង នៅក្នុងអាជីពជាកីឡាករ កីឡាការិនី ជម្រើសជាតិ ហើយការទៅហ្វឹកហាត់លើនេះ គឺក្នុងនាមជាតិទាំងមូល ក្រោមកិច្ចសហប្រតិបត្តិការ ក្នុងកម្រិតរាជរដ្ឋាភិបាល និងរដ្ឋាភិបាល។ ដូច្នេះយើងទាំងអស់គ្នា ត្រូវគោរពវិន័យ និងសេចក្ដីថ្លៃថ្នូរ ដើម្បីរក្សានូវកិត្តិយសនេះឲ្យប្រទេសទាំងពីរ និងឆ្ពោះទៅរកជោគជ័យនាឆ្នាំ២០២៣”។
ប្រតិភូ គ្រូបង្វឹក និងអត្តពលិកជម្រើសជាតិកម្ពុជា ដែលចេញទៅហាត់នៅចិនថ្ងៃនេះ គឺមានប្រតិភូ ២នាក់ ព្រមទាំងគ្រូ និងកីឡាករ កីឡាការិនី ១៥៩នាក់ ដែលមកពីសហព័ន្ធកីឡាកាយសម្ព័ន្ធ (១១នាក់), យូដូ (៥នាក់), វូស៊ូ (១០នាក់), បាល់បោះ (១៥នាក់), វាយកូនឃ្លីលើតុ (១០នាក់), អត្តពលកម្ម (២០នាក់), ចំបាប់ (១៥នាក់), វាយសី (១២នាក់), ហែលទឹក (១១នាក់), លើកទម្ងន់ (១០នាក់), បាល់ទាត់-នារី (២៥នាក់) និងកីឡាបាល់ទះ (១៥នាក់)៕