លោក Jamie Carragher បាននិយាយច្បាស់ៗថានៅពេលនេះគ្មានក្លឹបនៅអឺរ៉ុបមួយណាដែលចង់បានខ្សែប្រយុទ្ធ Cristiano Ronaldo នោះទេ។
Ronaldo ចង់ចាកចេញពីក្រុម Manchester United ក៏ដោយសារតែក្លឹបនេះមិនបានលេងពានរង្វាន់ UEFA Champions League ទេនារដូវកាលនេះ។ តែយ៉ាងណា ខ្សែប្រយុទ្ធវ័យ៣៧ឆ្នាំនៅមិនទាន់បានរកក្លឹបថ្មីលេងបាននៅឡើយទេ ដោយក្លឹបធំៗមួយចំនួនបានច្រានចោលសំណើរចង់បានទៅហើយ។ នៅពេលនេះ Ronaldo នៅបន្ដហ្វឹកហាត់ជាមួយក្រុមបិសាចក្រហមដដែល ហើយទំនងជាមិនអាចចាកចេញទៅណាបានទៀតផង។
ដោយសារតែរកផ្លូវចេញមិនបាននេះហើយ ទើបបានជាលោក Jamie Carragher បានចេញមុខមកនិយាយបែបនេះថា៖ “រឿងពិតគាត់ពេលនេះ៣៧ឆ្នាំហើយរដូវកាលនេះគាត់នឹងឈានដល់៣៨ឆ្នាំទៅហើយ គាត់មិនដូចមុនទៀតទេ។ គាត់នៅតែអាចរកគ្រាប់បាល់បាន ប៉ុន្តែគាត់មិនមែនជា Ronaldo មុនឡើយ។ គ្មានក្លឹបនៅអឺរ៉ុបណានាពេលនេះចង់បានគាត់ ខ្ញុំអាចគិតខុស។ ខ្ញុំគិតថាលោក Ten Hag នៅពេលនេះក៏ដូចគ្នា សមាជិកក្រុម Man Utd ក៏ទំនងជាមានអារម្មណ៍បែបនេះដែរ”៕