ដ្បិតធ្លាប់រួមជើងនឹងគ្នាច្រើនឆ្នាំ កាលនៅ Barcelona ហើយក៏ជាប់ឈ្មោះជាកីឡាករល្អដាច់គេមួយក្នុងលោក តែសម្រាប់ Lionel Messi ពុំបានស្ថិតនៅជម្រើស ១១ នាក់ល្អបំផុត ក្នុងការជ្រើសរើសរបស់មិត្តចាស់ Marc-Andre ter Stegen នោះឡើយ។
ផ្ទុយទៅវិញ ក្នុងទម្រង់ ៤-៤-២ ដែលអ្នកចាំទីសញ្ជាតិអាល្លឺម៉ង់ បានជ្រើសរើស បែរដាក់ឈ្មោះកីឡាករនៅជម្រើសជាតិរបស់គេច្រើនជាងមិត្តភ័ក្ដិនៅឯក្លឹប។ គេចាប់អារម្មណ៍នៅតំបន់ប្រយុទ្ធ Stegen ដកទាំង Messi, Neymar ហើយ Suarez ធ្លាប់ជាមិត្តចាស់កាលនៅ Barcelona រួមគ្នា រួចដាក់តែ Gerard Pique, Jordi Alba, Sergio Busquets, Xavi, Andres Iniesta និង Frenkie de Jong តែប៉ុណ្ណោះ។
រីឯកីឡាកររួមសញ្ជាតិដែលគេជ្រើសរើស មានដូចជាអ្នកចាំទី Janis Blaswich ខ្សែការពារ Antonio Rudiger និងខ្សែបម្រើ ប្រយុទ្ធ មាន Marco Reus និង Mario Gotze ជាដើម។ ឈុត ១១ រូបល្អបំផុត រៀបចេញពី Stegen មានដូចតទៅ៖ Blaswich; Alves, Pique, Rudiger, Alba; Busquets; Xavi, Iniesta; De Jong; Reus, Gotze៕