ខ្ញីកាន់តែចាស់ កាន់តែហឹរ ដូចគ្នាទៅនឹង Cristano Ronaldo បើទោះបីឈានចូលវ័យ ៣៧ ឆ្នាំទៅហើយ តែសមត្ថភាពបង្ហាញមកលើទីលាន នៅតែល្អដូចមុន ហើយអាចបង្កើតកំណត់ត្រាថ្មីជាបន្តបន្ទាប់។
ជាមួយការឈរជើងឲ្យក្លឹប Man Utd, Juventus និង Real Madrid ក៏ដូចជាជម្រើសជាតិព័រទុយហ្គាល់ សម្រាប់ខ្សែប្រយុទ្ធកម្ពស់ ១,៨៧ ម៉ែត្ររូបនេះ ក៏បានគ្រោងកំណត់ត្រាខ្នាតយក្ស ៥ ដែលជឿថាទោះច្រើនឆ្នាំទៅមុខទៀត ក៏ពិបាកនឹងរកអ្នកថ្មីមកស្នង ឬបំបែកបានដែរ៖
៥) រកបានគ្រាប់បាល់ច្រើនប្រកួតជាប់ៗគ្នានៅ UCL
អាចនិយាយថា Ronaldo គឺជាស្ដេចត្រាញ់ប្រចាំពានអឺរ៉ុប Chmapions League ដោយលោកបានបន្សល់កំណត់ត្រាអស្ចារ្យជាច្រើន ជាពិសេសកំឡុងពេលឈរជើងឲ្យក្លឹប Real Madrid ដែលឈ្នះពាន ៤ លើកនៅទីនោះ។
កំណត់ត្រាគួរឲ្យចាប់អារម្មណ៍មួយ គឺ Ronaldo អាចរកបានគ្រាប់បាល់ជាប់ៗគ្នា ដល់ទៅ ១១ ប្រកួត ធ្វើបានចាប់ពីវគ្គផ្តាច់ព្រ័ត្រ ឆ្នាំ ២០១៧ ទល់ Juventus រហូតមកដល់ជើងទី ២ វគ្គ ៨ ក្រុមនៅរដូវកាលបន្ទាប់។ ទាំងពីររដូវកាលនោះ ក៏ជាពេលវេលាលើកពាន ២ សម័យកាលជាប់គ្នា សម្រាប់ CR7 ផងដែរ។
៤) គ្រាប់បាល់ច្រើនបំផុតនៅ UCL
ជាងនេះ Ronaldo ក៏ជាអ្នករកបានគ្រាប់បាល់ច្រើនបំផុតនៅប្រវត្តិសាស្រ្ត Champions League ដោយបច្ចុប្បន្ន មាន ១៤០ គ្រាប់ ទល់ក្លឹបទាំង ៣៨ ផ្សេងពីគ្នា។ តួលេខនេះ នាំមុខទៅលើ Lionel Messi ១៥ គ្រាប់ ហើយក៏នឹងនៅតែអាចបន្តកើនឡើង ដរាបណាលោកមិនទាន់ចូលនិវត្ត។
៣) ជាកីឡាករវ័យចំណាស់បំផុត រកបាន Hat-trick នៅ World Cup
ស្ថិតិជាមួយក្រុមជម្រើសជាតិព័រទុយហ្គាល់ឯណេះក៏មិនណយនោះដែរ ហើយ ៣ គ្រាប់ កាលពីឆ្នាំ ២០១៨ ទល់អេស្ប៉ាញ គឺជាគ្រាប់បាល់ Hat-trickរបស់កីឡាករវ័យចំណាស់បំផុតប្រចាំពានរង្វាន់លំដាប់ពិភពលោក។ ពេលនោះ Ronaldo មានអាយុ ៣៣ ឆ្នាំ និង ១៥០ ថ្ងៃ។
២) ជាកីឡាកររកបានគ្រាប់បាល់ច្រើនបំផុតនៅជម្រើសជាតិ
FIFA មានប្រទេសជាសមាជិកចំនួន ២១១ ប្រទេស តែបើសួរថា កីឡាករនៃក្រុមជម្រើសជាតិណា រកបានគ្រាប់បាល់ច្រើនបំផុត? ចម្លើយក៏នៅតែជា Ronaldo។ មុននេះ គ្រោងដោយ Ali Daei វីរបុរសអ៊ីរ៉ង់ ធ្វើបាន ១០៩ គ្រាប់ ហើយមកទល់បច្ចុប្បន្ន CR7 រកបាន ១១៥ គ្រាប់ ជាតួលេខដែលពិបាកនឹងផ្តួលបំផុត សម្រាប់ក្មេងជំនាន់ក្រោយ។
១) ជាកីឡាកររកបានគ្រាប់បាល់ច្រើនបំផុតក្នុងលោក
បើយើងនិយាយតែទិន្នន័យស្រង់ចេញដោយ FIFA គឺ Ronaldo ជាអ្នករកបានគ្រាប់បាល់ច្រើនបំផុតហើយនៅពេលបច្ចុប្បន្ន។ កំឡុងការប្រកួតទល់ Spurs ដែលធ្វើបាន ៣ គ្រាប់ម្នាក់ឯង ក៏សម្រេចរុញឲ្យ Ronaldo ឡើងតួលេខ ដល់គ្រាប់បាល់ទី ៨០៦ នេះយកឈ្នះលើអ្នកគ្រោងចាស់ គឺ Josef Bican មាន ៨០៥ គ្រាប់៕
ប្រភព៖ បរទេស